Колесов Семён Егорович

Бикипиэдьийэ диэн сиртэн ылыллыбыт
Перейти к навигации Перейти к поиску

Колесов Семён Егорович (1930—2003) — учуутал, спортсмен, тириэньэр.

1930 сыллаахха алтынньы 14 күнүгэр Акулина Прокопьевна уонна Егор Дмитриевич Охлопковтар дьиэ кэргэннэригэр төрөөбүтэ. Кини орто уонна үрдүкү кылаастарга үөрэнэригэр ийэтин бииргэ төрөөбүт убайыгар Колесов Василий Прокопьевичка иитиллибитэ уонна үөрэммитэ, ол иһин Колесов диэн буолбута. Хас да сыл Өлүөхүмэҕэ үөрэммитэ, орто оскуоланы Таатта оройуонугар Ытык-күөлгэ 1949 сыллаахха ситиһиилээхтик бүтэрбитэ. Онтон 1950 с. Дьоккуускайга педагогическай институт нуучча тылын салаатыгар ситиһиилээхтик туттарсан киирбитэ. Эргиччи талааннаах уолу спорт хас да көрүҥэр институт сүүмэрдэммит хамаандатыгар чилиэнинэн ылбыттара. Онтон ыалдьан хаалан салгыы үөрэммэтэҕэ. 1951 с. Красноярскайдааҕы политехническай институкка киирбитэ. Төннөн кэлээт, Ытык-Күөлгэ физкультура уонна спорт оройуоннааҕы комитетын бэрэссэдээтэлинэн ананан икки сыл үлэлээбитэ.

1953 сыллаахха Алдан эҥэринээҕи нэһилиэктэр Таатта оройуонуттан арааарыллан Томпо оройуонугар бэриллибиттэр. Ол кэмҥэ Кириэс-Халдьаайы Томпо оройуонун киинэ этэ. Семен Егорович төрөөбүт түөлбэтигэр төннөн библиотека сэбиэдиссэйинэн үлэлиир. Онтон 1954 сыллаахтан педагогическай үлэтин саҕалыыр. Сыл тохтоло суох физкультура учууталынан үлэлиир. Кини үлэлиэҕиттэн үөрэнээччилэр спордунан дьарыктаналлара олус күүһүрбүт. Семен Егорович тус бэйэтэ араас күрэхтэһиилэргэ, кэнсиэрдэргэ көхтөөхтүк кыттара. 1958 с. Дьокуускайга Саха АССР норуоттарын иккис спартакыйаадатыгар үөрэнээчитиниин Толбонов Мишалыын хапсаҕайга республика чемпионнара буолбуттара. Онтон 1961, 1962 сыллардаахха чэпчэки аҥаардаах уонна орто ыйааһыҥҥа тустан эмиэ чемпионнаабыта. Спордунан эрэ муҥурдаммакка нэһилиэктээҕи, оройуоннааҕы ыытыллар тэрээһиннэри үрдүк таһымнаах тэрийэрэ. Семен Егорович үөрэнээччилэрэ кини туйаҕын хатаран үгүстэрэ спорт эйгэтигэр республика араас улуустарыгар учууталлаабыттара, тренердаабыттара. Кини үөрэппит оҕолоруттан бастыҥ спортсменнарынан В.Г Саввина, А.Д Харитонова, В.Г Кутяркина, М.С Толбонов, Г.А Степанова, атах оонньуутугар спорт маастара Н.Д Аргунов, маастарга кандидаттар В.В Габышев, Н.А Ючюгаев, В.П Карбаканов, Е.С. Мекюрдянов уо.д.а.

1955 с. Сахасталина Гаврильевналыын ыал буолан үс кыыс, биир уол оҕолоноллор. Оҕолоро эмиэ республика туйгуннара буоллаллар. Сахасталина Гаврильевна педагогическай үлэ, тыыл ветерана, Саха Республикатын үөрэҕэриитин туйгуна, РФ уопсай үөрэҕэриитин бочуоттаах үлэһитэ. Колесовтар дьиэ кэргэннэрэ Саха Өрөспүүбүлүкэтин учууталларын династияларын ахсааныгар киирсэр.

Семен Егорович ыарахан ыарыыттан 2003 c. сэтинньи 21 күнүгэр 73 сааһыгар өлбүтэ.