Шадрин Григорий Абрамович

Шадрин Григорий Абрамович Ньурба улууһун Бордоҥ нэһилиэгэр Айда түбэтигэр Ыылаах диэн алааска орто сэниэ дьиэ кэргэҥҥэ төрөөбүтэ.

Маалыкай сэлиэнньэтигэр аһыллыбыт Мэгэдьэктээҕи церковнай-приходской оскуоланы бүтэрэн баран Куочайдааҕы икки кылаастаах норуодунай училищены ситиһиилээхтик үөрэнэн бүтэрэн, оскуолаҕа учууталлыыр быраабы ылбыта уонна дойдутугар Маалыкайга тахсан саҥа аһыллыбыт норуодунай оскуолаҕа директорынан үлэтин саҕалаабыта, онтон 1916 сылтан Аммосовка бөһүөлэгэр (Ньурба улууһугар) начальнай оскуола учууталынан – сэбиэдиссэйинэн үлэлээбитэ. Активнай позициялаах, үөрэхтээх үлэһит эдэр киһини советскай үлэҕэ өрө таһаарбыттара – Ньурба улууһун управатын секретарынан, онтон салгыы милиция Ньурбатааҕы уонна Бүлүүтээҕи учаастактарын комиссарынан үлэлэппиттэрэ. 1922-1927 сылларга Мэгэдьэк, Малдьаҕар оскуолаларын учууталынан – сэбиэдиссэйинэн үлэлээбитэ, 1927 сыллаахха Ньурба улууһун Советын исполкомун председателинэн талыллыбыта.

Григорий Абрамович үлэтин бүтэһик отучча сылларын норуот үөрэҕириитин салаатыгар анаабыта, итинтэн уон сэттэ сыл устата үлэһиттэр депутаттарын Ньурба оройуонунааҕы Советын ситэриилээх комитетын норуот үөрэҕириитин отделын инспекторынан тохтоло суох олус таһаарыылаахтык үлэлээбитэ. Итинтэн көстөрүнэн кини норуот үөрэҕириитэ сайдарыгар республикаҕа уонна ордук төрөөбүт оройуонун ыччаттара үөрэх-билии суолугар үктэнэллэригэр улахан сыратын билиитин-көрүүтүн биэрбитэ. Кини дьиҥнээх учууталлар учууталлара этэ. Григорий Абрамович Шадрин саха бастакы үөрэхтээх интеллигеннэрин биир чаҕылхай представителэ буолар. Кини үлэтэ-хамнаһа Советскай правительствонан үрдүктүк сыаналаммыта – «Бочуот Бэлиэтэ» орденнарынан икки төгүл наҕараадаламмыта, итини тэҥэ «Үлэҕэ килбиэнин иһин», «Улуу Аҕа дойду сэриитин сылларыгар килбиэннээх үлэтин иһин» медалларынан бэлиэтэммитэ, РСФСР үөрэҕириитин туйгуна, Саха АССР үтүөлээх учуутала, Ньурба улууһун Бочуоттаах олохтооҕо диэн знактар хаһаайыннара буолбута.