Сабарай Илгэ

Сабарай Илгэ Парникова Анна Алексеевна — бэйиэт.

1959 сыллаахха муус устар 17 күнүгэр Уус Алдан оройуонугар Суотту нэһилиэгэр төрөөбүтэ. 4 саастааҕар дьоно ийэтин дойдутугар Нам улууһун Бартыһааныгар көспүттэр. Аҕата Парников Алексей Николаевич агроном үөрэхтээҕэ, килбиэннээх үлэтин иһин уордьаннааҕа. Ийэтэ Мария Спиридоновна оскуола учуутала. Ыал 6 оҕотуттан улаханнара.

Свердловскайдааҕы университет философскай факультетыгар уонна Ленинградтааҕы университет библиотечнай факультетыгар үөрэнэ сылдьыбыта.

1992 сыллаахха «Куйаас сайын» диэн хоһооннор хомуурунньуктарын таһаартарбыта. 1997 сылтан Саха Өрөспүүбүлүкэтин Суруйааччыларын сойууһун чилиэнэ.

2003 сыллаахха «Күн баҕам» хомуурунньуга тахсыбыта. Онно аннотациятар маннык суруллар: «бу поэт истиҥ иэйиитин дневнигэ. Манна „күлүм“ гына түһэр түгэн өр үйэлээҕи, ааспыт кэм кэлэр кэми, истурук тас эйгэни кытта алтыһын ылар. Сабарай Илгэ поэзията — олоҕу туойуу, олоххо ода. Аахтар ааҕан бардаҕыҥ ахсын ааптар олоххо тапталыгар умсугуйаҕын. Поэт биһигини олох хас биирдии чыпчылҕаныттан таптыырга ыҥырар.»

2015 сыллаахха «Күһүҥҥү ыһыаҕым» хомуурунньуга күн сирин көрбүтэ.

2017 сыл от ыйыгар ыарахан ыарыыттан өлбүтэ.

Сабарай Илгэни Наталья Михалева - Сайа «Хоһоон хонуутун көстүбэт Хотуна» диэн ааттаабыта, чахчы да оннук этэ. Дьоннуун улаханнык алтыспат, олоҕун бүтүннүү поэзияҕа, айар үлэҕэ анаабыт «үрдүкү поэзия» уһулуччулаах бэрэстэбиитэлэ этэ.

Аатын үйэтитии

2025 сыллаахха төрөөбүт күнүн көрсө Бартыһаан бибилэтиэкэтигэр Сабарай Илгэ аатын иҥэрбиттэрэ.