Кривошапко Галина Михайловна

Кривошапко Галина Михайловна (1916 бэс ыйын 17 — 2013 олунньу 6) — дирижер.

Олоҕун олуктара уонна айар үлэтэ

1916 сыл бэс ыйын 17 күнүгэр Омскай куоракка төрөөбүтэ.
Омскайга музыка техникум фортепьяно отделениетын уонна Москва куоракка консерваторияны опера уонна симфония отделениетын бүтэрбитэ.
1941 сыл олунньутугар Дьокуускайга кэлэр, радиоҕа пианистканнан үлэлиир.
1945 сылтан хормейстер.
1948 сылтан хас да уон сыл Саха радиотын уонна телевидениетын симфония оркестрын салайбыта.
1949 сылга А. С. Пушкин 150 сылыгар П. И. Чайковскай «Евгений Онегин» оператын сахалыы (И. Чаҕылҕан тылбааһа) концерт толоруутун бэлэмнээн туруорбута.
1952 сыллаахха Саха АССР 30 сылыгар С. Рахманинов «Алеко» оператын нууччалыы уонна сахалыы туруорбута.
1957 сылга саас Москва куоракка буолар Саха Сирин күннэрин художественнай салайааччытынан уонна сүрүн дирижерынан ананар. Ол кэмҥэ Галина Михайловна консерваторияҕа үөрэнэр эбит. Бэйэтэ ахтарынан ректор Свешниковка ыҥыран ылан Саха сиригэр ыҥырар тэлэгирээмэ туттарбыттар. Кини иннинэ оҥоһуллубут программаны Москубаттан кэлбит хамыыһыйа сирбит эбит, ол иһин ким эрэ кинини ыҥырарга өй укпут. Кривошапко элбэх биллэр режиссердары кытта кэпсэтэн, сүбэлэттэрэн баран Маалай тыйаатыр режиссерун Ровенских сүбэтинэн Большой тыйаатырга стажердуу сылдьар эдэр режиссеру Иоаким Шароевы ыҥырбыт. Иван Писарев диэн Москуба тыйаатырын худуоһунньугар Афанасий Осипов уонна Георгий Туралысов көмөлөспүттэр. Онон декорация уһулуччу үчүгэй буолан тахсыбыта диэн ахтар Кривошапко. Бастакы аакка көстөр саха өрүһүн хочото көрөөччүлэри сөхтөрбүтэ, бастакы акт барыта ытыс таһыныынан доҕуһуолламмыта диэн ахтар Кривошапко. Аал Луук маспыт эмиэ салыннарбыта (потряс москвичей) диэн ахтар кини. Ньургун Боотур Уот Уһутаакыны кытта охсуһуутугар пиротехника туттуллубута, бары сөҕөн саҥата суох ах барбыттара диир. Ол охсуһууну көрдөрөөрү Тыва сыыркатын артыыстарын ыҥырбыттар (бухатыырдар сыана үрдүнэн тардыллыбыт канаакка туран охсуспуттар). Туйаарыма Куону Анна Егорова ыллаабыт. Ньургун Боотуру бастакы испэктээккэ Илья Перевалов (олоҥхону иккитэ көрдөрбүттэрэ), иккискэ Николай Баскаров ыллаабыттар. Акиснья Адамова Кыыс Кыскыйдааны наһаа үчүгэйдик ыллаабыт, испэктээк кэнниттэн сарсыарда аатыран уһуктубута диэн ахтар Кривошапко. Үҥкүүлэри Дьокуускай муусука-дыраама тыйаатырыгар үлэлээбит Василий Козлов туруорбут.

Ол сыл ахсынньы 11—12 олус ситиһиилээхтих түмүктэммиттэрэ. Москвичтары ордук М. Н. Жирков уонна – Г. И. Литинскай «Ньургун Боотур» операта сөхтөрбүтэ.

1960 сылтан П. А. Ойуунускай аатынан музыка уонна драма театрын сүрүн дирижерынан ананар.
1961 сыллаахха Саха Сиригэр маҥнай П. И. Чайковскай «Кубалаах күөл» балетын туруорар.
1964 сыллаахха П. А. Ойуунускай аатынан музыка уонна драма театр сценатыгар Ж. Батуев саха норуотун суруйааччытын Эллэй айымньытынан «Чурумчуку» балет туруоруллар .
1965 сыллааахха Г. Григорян «Лоокуут уонна Ньургуһун» операта туруоруллар.
1964 сыл бэс ыйыгар Дьокуускайга буолбут нуучча литературатын Күннэригэр «Евгений Онегины» Нуучча драма театрыгар туруорар.
2013 сыл олунньу 6 күнүгэр Дьокуускайга өлбүтэ.

Наҕараадалара уонна ытык ааттара

РСФСР үтүөлээх артыыһа
Саха АССР норуодунай артыыһа
Саха Өрөспүүбүлүкэтин Ытык гражданина^[1] (2002)
«Хотугу сулус» уордьан^[2] (2011)

Быһаарыылар

Өссө маны көр

Ылыллыбыт сирэ

Саха Республикатын Ил саайта

[1] Официальный информационный портал Республики Саха (Якутия):Почетные граждане Республики Саха (Якутия)

[2] Официальный информационный портал Республики Саха (Якутия):Кавалеры Ордена Республики Саха (Якутия) "Полярная звезда" — список награжденных

[1]

[2]