Колесов Гавриил Гаврилович

Колесов Гавриил (Гаврил) Гаврилович (08.03.1932—1997) — саха артыыһа, суруйааччыта, Саха АССР норуодунай артыыһа. Ойуунускай аатынан СӨ Ил бириэмийэтин лауреата.

Олоҕун олуктара

1932 сыллаахха кулун тутар 8 күнүгэр Мэҥэ-Хаҥалас улууһун Иккис Баатара нэһилиэгэр төрөөбүтэ. Кыра эрдэҕиттэн норуот ырыаларын уонна остуоруйаларын истэн улааппыта, олоҥхоһуттары истэрэ.

1950 с. 18 сааһыгар Саха араадьыйатын кэмитиэтин хуоругар ылыллыбыта. 1954 с. аан бастаан «Дьулуруйар Ньургун Боотур» олоҥхону толорбута.

1957 - 1997 сс. П. А. Ойуунускай аатынан Саха академическай тыйаатырыгар үлэлээбитэ. Элбэх хараактырдаах оруолу толорбута: Алампа «Манчаары» дырааматыгар Ыстапаанка, Кындыл Уйбаан «Наара Суох» дырааматыгар Наара Суох, Софр. Данилов «Сүрэх тэбэрин тухары» дырааматыгар Нахов, Ойуунускай «Кыһыл ойуунугар» Саһыл Ойуун, Ойуунускай – «Улуу Кудаҥсатыгар» Чачыгыр Таас ойуун. Дьүрүл испэктээктэргэ: «Лоокуут уонна Нюргуһун» - Чычып Чаап партиятын, Тиэхэ Тиэхээн – Г.Григорян "Сир симэҕэ" («Цветок Севера») опереттатыгар, Ж.Батуев «Чурумчуку» балетыгар Чупчуруйдаан чаҕара.

1968 с. балаҕан ыйын 5-25 күннэригэр учуонай И.В. Пухов салайыытынан уонна тэрээһининэн Гаврил Колесов «Дьулуруйар Ньургун Боотур» олоҥхону толору толорон «Мелодия» Ленинградтааҕы устуудьуйатыгар уһулларбыта.

Г.Г. Колесов 1957 с. Москубаҕа буолбут VI Ыччат аан дойдутааҕы бэстибээлин кыттыылааҕа.

Хас да кинигэ ааптара, 1982 с. ССРС Суруйааччыларын сойууһун чилиэнэ.

Г.Г. Колесов 1997 сыллаахха атырдьах ыйын 31 күнүгэр өлбүтэ.

Айар үлэтэ

Айымньылара 1961 сыллаахтан бэчээттэнэллэр. Бастакы кинигэтэ «Булчут сиэнэ» 1964 сыллаахха күн сирин көрбүтэ.

Кинигэлэрэ

• «Кэскил»
• «Yc аҕыраабат абылаҥнарым»

Наҕараадалара уонна ытык ааттара

1962 с. Саха АССР үтүөлээх артыыһа, 1971 с. Саха АССР норуодунай артыыһа. 1982 с. РСФСР үтүөлээх артыыһа. 1975 с. «Бочуот знага» уордьанынан наҕараадаламмыт.

• Саха АССР норуодунай артыыһа
• Российскай Федерация үтүөлээх артыыһа
• «Бочуот Знага» уордьан (1975)
• «За трудовую доблесть» мэтээл (1958)
• «За доблестный труд. В ознаменование 100-летия со дня рождения В. И. Ленина» мэтээл

1995 с. сэтинньи 10 күнүгэр СӨ Бэрэсидьиэнин ыйааҕынан Ойуунускай аатынан СӨ Ил бириэмийэтин лауреата буолбута.

Аатын үйэтитии

Г. Г. Колесов аатын Мэҥэ-Хаҥалас улууһугар Сымах с. тыа культуратын Дьиэтэ сүгэр.

Өссө маны көр

• Саха норуодунай артыыстарын тиһигэ

Сигэлэр

• Электронная память Арктики:Колесов Г. Г.
• Портал информационной системы Олонхо:Колесов Гавриил Гавриилович