Кириллин Петр Дмитриевич II

Кириллин Петр Дмитриевич II — Саха АССР уон биирис ыҥырыылаах Үрдүкү Сэбиэтин дьокутаата.

1939 сыллаахха Ньурба оройуонун Бордоҥ нэһилиэгэр Улахан Күөл учаастагар колхозтаахтар кэргэннэригэр төрөөбүтэ.

Маалыкай сэттэ кылаастаах, Ньурба орто оскуолатын ситиһиилээхтик үөрэнэн бүтэрэн, үрдүк үөрэххэ киирэн хайа инженерин-маркшейдерин идэтин баһылаабыта. 1961 сыллаахха үөрэҕин бүтэрэн кэлэн, бастаан старшай, онтон кылаабынай маркшейдерынан, сотору буолаат алмаастаах «Айхал» трубкатын карьерыгар производственнай-техническэй отдел начальнигынан ананан үлэлээбитэ.

Онтон кинини 1975 сыллаахха партия уобаластааҕы комитетын промышленнай отделын инструкторынан сыҕарыппыттара. 1980 сыллаахха П.Д. Кириллини партия Алдан оройуонунааҕы комитетын иккис секретарынан, сотору буолаат ССКП Мирнэй куораттааҕы комитетын иккис секретарынан, онтон салгыы үлэһиттэр депутаттарын Мирнэй куораттааҕы Советын ситэриилээх комитетын председателинэн талан үлэлэппиттэрэ. 1997 сыллаахха «АЛРОСА-Нюрба» ААО директордарын Советын председателинэн талбыттара, кини бу үлэҕэ пенсияҕа тахсыар диэри үлэлээбитэ. Үөһэ ааттаммыт улахан эппиэттээх үлэлэргэ Петр Дмитриевич Кириллин билиитин-көрүүтүн толору биэрэн, олус бэриниилээхтик, тахсыылаахтык үлэлээбитэ.

Кини Саха АССР уон биирис ыҥырыылаах үрдүкү Советын депутатынан талыллыбыта, 1994 сыл сэтинньитигэр Информатизация Аан дойдутааҕы академиятын дьиҥнээх чилиэнинэн буолбута. Кини ситиһиилээх үлэтэ «Килбиэннээх үлэтин иһин», «Защитнику свободной России» диэн медалларынан, Саха АССР Үрдүкү Советын Президиумун Бочуотунай грамоталарынан бэлиэтэммитэ. Кириллин Петр Дмитриевич Саха АССР норуотун хаһаайыстыбатын үтүөлээх үлэһитэ, Мирнэй куорат уонна Ньурба улууһун Бочуоттаах олохтооҕо.