Кириллин Петр Дмитриевич I

Бикипиэдьийэ диэн сиртэн ылыллыбыт
Навигацияҕа көс Көрдөбүлгэ көс

Кириллин Петр Дмитриевич I — Ньурба оройуонун I Бордоҥ нэһилиэгэр Улахан Күөл түбэтигэр 1930 сыллаахха дьадаҥы бааһынай кэргэнигэр төрөөбүтэ.

1949 сыллаахха Ньурба орто оскуолатын бүтэрэн баран Дьокуускайга учительскай институкка үөрэнэн физика уонна математика учууталын идэтин баһылаан Маалыкай сэттэ кылаастаах оскуолатыгар учууталлаабыта, онтон 1953-55 сылларга Чуукаар сэттэ кылаастаах оскуолатыгар директорынан, 1956-1961, 1965-1967, 1968-1969 сылларга Маалыкай орто оскуолатыгар машиноведение преподавателинэн үлэлээбитэ.

1961-1965 сылларга Степан Васильев аатынан колхозка учаастак сэбиэдиссэйинэн, колхоз правлениетын председателин солбуйааччытынан, 1967-1968 сылларга колхоз парткомун босхоломмут секретарынан, 1969-1978 сылларга совхоз Маалыкайдааҕы отделениетын управляющайынан, директорын хаһаайыстыбаннай чааска солбуйааччытынан, онтон 1978-1989 сылларга Маалыкайдааҕы совхоз-рабкооп председателинэн бэрт тахсыылаахтык үлэлээбитэ.

П.Д.Кириллин элбэх ыччатын үөрэтэн-иитэн олох киэҥ аартыгар үктэннэрбитэ, кылаас салайааччытын быһыытынан Маалыкай оскуолатыгар үс выпуһу таһаарбыта – кини үөрэппит оҕолоруттан икки наука доктора, хас да наука кандидата үүнэн тахсыбыттара.

Холкуос, совхоз салалтатыгар үлэлиир бириэмэтигэр былааннаах сорудахатары, социалистическай эбэһээтэлистибэлэри куруутун аһара толортоон хайҕабылга сылдьыбыта, колхоз, совхоз, совхоз-рабкооп материальнай-техническэй базалара, экономикалара бөҕөргөөһүнүгэр утумнаах үлэни ыыппыта.

Кини лектор, пропагандист, олохтоох советтар депутаттарын, исполкомнарын чилиэнин быһыытынан общественнай үлэҕэ активнайдык кыттара.

П.Д.Кириллин үлэтэр үрдүктүк сыаналаммыта: «1941-1945 сылларга Аҕа дойду улуу сэриитин сылларыгар килибиэннээх үлэтин иһин», «Үлэ ветерана» медалларынан наҕараадаламмыта, «Советскай потребкооперация туйгуна» бэлиэнэн, ЫБСЛКС Киин комитетын, уобаластааҕы комитетын, «Знание» общество республиканскай тэрилтэтин, партия райкомун, райсовет исполкомун бочуотунай грамоталарынан, «Холбос» респротребсоюз правлениетын I степеннээх дипломунан наҕараадаламмыта. Ньурба улууһун Депутаттарын мунньаҕын 1998 сыл бэс ыйын 18 күнүнээҕи уурааҕынан (Прот. №17, п.5) П.Д.Кириллиҥҥэ Ньурба улууһун Бочуоттаах олохтооҕун аата иҥэриллибитэ.