Иванова Нина Алексеевна

Бикипиэдьийэ диэн сиртэн ылыллыбыт
Навигацияҕа көс Көрдөбүлгэ көс

Иванова Нина Алексеевна (01.04.1952 с.- 06.09.2019 с.) — педагогическай үлэ уонна спорт бэтэрээнэ, Үөһээ Бүлүү улууһун Бочуоттаах учуутала.

Иванова Н.А. (2009, Хоро)

Олоҕун кэпсээнэ[уларыт | биики-тиэкиһи уларытыы]

Иванова Нина Алексеевна 1952 сыллаахха муус устар 1 күнүгэр Үөһээ Бүлүү оройуонун Оҥхой нэһилиэгэр төрөөбүтэ. Ийэтэ Иванова Мария Никифоровна (1911-1.03.1999), Оҥхой нэһилиэгэр, 1957 сыл сайыныгар «Чөмчөрү» диэн сайылык ферматыгар үлэлии олорон, Далыр нэһилиэгин I Күүлэт Захаров Захар Захарович I диэн сылгыһыт киһиэхэ (1900-1.07.1966) кэргэн тахсан Далырга көһөн барбыттара. 1960 сыллаахха Далыр орто оскуолатын бастакы кылааһыгар үөрэнэ киирбитэ. Үөрэҕэр туйгун буолан 1962 сыллаахха «Бэлэм Буол» хаһыакка «Володя Ульянов дневнигэр» хаартыската тахсыбыта. Ити сыл сааһыгар, колхоз бөдөҥсүйэн, Хороҕо эдьиийин кытта көһөн киирбитэ. 1968 сыллаахха Үөһээ-Бүлүү оройуонун Хоро 8 кылаастаах оскуолатын үөрэнэн бүтэрэн баран Н. Г. Чернышевскай аатынан Бүлүүтээҕи педагогическай училище физкультурнай отделениетыгар үөрэнэ киирбитэ.

Үлэтэ-хамнаһа[уларыт | биики-тиэкиһи уларытыы]

Биологияҕа бүтүн Арассыыйатааҕы олимпиадалар призердарын Яковлев Ильяны кытта, (2005, ыам ыйа)

1971 сыллаахха Бүлүүтээҕи педагогическай училищены үөрэнэн бүтэрэн баран Уус-Алдан оройуонугар Чэриктэй аҕыс кылаастаах оскуолатыгар физкультура учууталынан ананан үлэтин саҕалаабыта. Үөһээ Бүлүү оройуонуттан үһүс киһинэн физкультура учуутала идэлээх дьахтар буолар. 1972—1975 сылларга I Боотулуу орто оскуолатыгар учууталлыыр, 1975 сылтан Хоро орто оскуолатыгар. 1985 сыллаахха Саха государственнай университетын биолого-географическай факультет биологическай отделениетын үөрэнэн бүтэрэр. 2005 сылтан бочуоттаах сынньалаҥҥа олорор.

Спортка ситиһиилэрэ[уларыт | биики-тиэкиһи уларытыы]

Устудьуоннуур сылларыттан спордунан утумнаахтык дьарыктанар. Бастакы тириэньэрэ (волейболга) Абрамов Прокопий Нифонтович буолар. Бүлүү педучилищетын волейбольнай хамаандатын солбуллубат капитана, Дальнай Восток регионугар тиийэ спорт араас көрүҥнэригэр күрэхтэспитэ. Хайыһарга, волейболга, баскетболга, чэпчэки атлетикаҕа бастакы разряд нуорматын толорбута.

Иванова Нина Алексеевна спорка ситиһиилэрэ:

  • 1969 с. Дьокуускай куоракка орто анал үөрэх тэрилтэлэрин икки ардыгар ыытыллыбыт Спартакиадаҕа уһуну ыстаныыга, үрдүгү ойууга бастакы миэстэ.
  • 1968—1971 сылларга Бүлүүтээҕи педучилище волейболга, баскетболга, чэпчэки атлетикаҕа, хайыһарга, буулдьанан ытыыга чемпиона, призера, үҥүүнү быраҕыыга рекордсменката
  • 1969 сыллаахха Дальнай Востокка орто анал үөрэх тэрилтэлэрин икки ардыгар ыытыллыбыт Спартакиадаҕа кыттан үҥүүнү быраҕыыга IV миэстэ, уһуну ыстаныыга VI миэстэ.
  • 1974 с. үҥүүнү быраҕыыга Үөһээ Бүлүү оройуонун чөмпүйүөнэ.
  • 1974 с. Саха сирин норуоттарын VII сайыҥҥы Спартакиадаларыгар үҥүүнү быраҕыыга IV миэстэ
  • 1978 с. Саха сирин норуоттарын VII уонна VIII (1981 с.) кыһыҥҥы Спартакиадаларыгар хайыһарынан сүүрүүгэ кыттыылааҕа.
  • Үөһээ Бүлүү оройуонун, Бүлүү зонатын волейболга хас да төгүллээх чөмпүйүөнэ.

Наҕараадалара[уларыт | биики-тиэкиһи уларытыы]

Саха Өрөспүүбүлүкэтин Үөрэҕин министиэристибэтин, ФК уонна Спорт кэмитиэтин Махтал суруктарынан наҕараадаламмыта. Үөһээ Бүлүүтээҕи үөрэх салаатын начальнигын 2017 сыл кулун тутар 20 күнүнээҕи быһаарыытынан «Үөһээ Бүлүү улууһун Бочуоттаах учуутала» аат иҥэриллибитэ.