Чолбодуков Григорий Егорович

Чолбодуков Григорий Егорович — СӨ доруобуйатын харыстабылын туйгуна.

Григорий Егорович 1936 сыл кулун тутар 1 күнүгэр Сунтаар оройуонун Толстой нэһилиэгэр күн сирин көрбүтэ. 1946 с. Сунтаардааҕы орто оскуола аанын аһан бастакы кылааска үөрэнэ киирбитэ. Үөрэххэ тардыһар уолчаан оскуола, кылаас олоҕор мэлдьи көхтөөхтүк кыттара, үчүгэйдик үөрэнэрэ. Оскуолатын 1956 с. үчүгэйдик бүтэрбитэ. Биир сыл «Партизан» аатынан холкуоска үлэлээбитэ.

1957 с. киирии экзаменнарын туттаран Томскайдааҕы медицинскэй институтка үөрэххэ киирбитэ. Үөрэҕин 1963 с. бүтэрэн, быраас идэтин баһылаан төрөөбүт дойдутугар эргиллэн кэлбитэ. Эдэр эрэллээх киһини Бүлүүчээн нэһилиэгин балыыһатыгар сүрүн бырааһынан анаан ыыталлар. Эдэр киһи үлэтин үчүгэйдик саҕалыыр, тапталын көрсөн ыал буолар.

1964 с. Сунтаар оройуоннааҕы доруобуйа харыстабылын салаата эдэр, ирдэбиллээх үлэһити Кэппэндээйитээҕи бадараанынан эмтиир балыыһатын сүрүн бырааһынан анаан үлэҕэ ыытар. Эдэр ыал саҥа сиргэ көһөн, үлэлэрин саҕалыыллар. Кэргэнэ Ксения Игнатьевна учуутал идэлээх, өр сылларга Кэппэндээйитээҕи орто оскуолаҕа химия уонна биология учууталынан үлэлээбитэ. Кинилэр икки оҕолоохтор, биир иитиэх кыыстаахтар. Оҕолор улаатан билигин ийэлэрин курдук учуутал идэтин талан үлэлии-хамныы сылдьаллар.

Григорий Егорович эмтээх күөл айылҕатын харыстыырыгар, балыыһа үрдүк таһымҥа тахсарыгар үгүс сыратын биэрэн туран үлэлээбитэ. Мэлдьи эмтээх күөл бадараана ыраас буоларын туһугар кыһанара уонна ону ирдиирэ. Кини салалтатынан 1967 с. балыыһа эмтэнэр, онтон 1968 с. ваннай дьиэтэ үлэҕэ киирэллэр. 1973 с. балыыһа 50 миэстэҕэ дылы кэІиир уонна Кэппэндэйитээҕи бадраанынан эмтиир терапевтичэскэй балыыһа буолар.

Григорий Егорович олоҕун дьон доруобуйата тупсарыгар анаан үлэлээбитэ. Кини республика, оройуон доруобуйаны харыстыыр дьаһалталарын, салайан үлэлэппит дьонун-сэргэтин, ыарыґахтарын үрдүк ытыктабылларын ылара. Григорий Егорович үлэтинэн эрэ биллэр буотах этэ. Кини I разрядтаах дуобатччыт быһыытынан эмиэ биллэрэ, элбэх оройуон, республика таһымнаах күрэхтэргэ кыттара.

Григорий Егорович өр сылларга үлэлээбит сыратын бэлиэтээн 1982 с. «Отличник здравоохранения» үрдүк аатын иҥэрэллэр. Кини элбэх грамотанан уонна «Ветеран Труда» диэн мэтээлинэн наҕараадаламмыта.

Өр сылларга үлэлээбит, элбэх үтүөнү оҥорбутун туһугар, элбэх дьон ытыктабылын ылан 1995 с. тохсунньу 24 күнүн уурааҕынан Кэппэндээйитээҕи бадараанынан эмтиир балыыһаҕа кини аатын иҥэрэллэр. Билигин манна эмтэнэ эрэ кэлбэттэр, сынньана эмиэ кэлиэххэ сөп онон «Санаторий-профилакторий имени Г. Е. Чолбодукова» диэн ааттанар АЛРОСА-ҕа бас бэринэр.