Хотугу ыччат (хаһыат)

«Хотугу ыччат» — ыччакка аналлаах бастакы сахалыы тахсыбыт хаһыат.

Саха хомсомуолун (РЛКСМ) обкуомун уоргана. Бастакы нүөмэрэ 1924 сыллаахха алтынньы 24 күнүгэр тахсыбыт. Эрэдээктэрэ С. Кулачиков. Тэҥҥэ нууччалыы «Молодёжь Севера» тахсар этэ. Ол эрээри кыах (харчы, кумааҕы уонна суруналыыс) тиийбэт буолан биир таһаарыыга холбообуттара. 1925 сыллаахха кулун тутар 18 күнүгэр онон «Хотугу ыччат» («Молодёжь Севера») икки тыллаах нүөмэрэ тахсыбыта. Ааҕааччыларга «из-за материальных затруднений» диэн быһаарбыттара. Холбоһуктаах редколлегияҕа Г. Емельянов, Б. Шишакин, С. Кулачиков киирбиттэрэ. 1925 сыл ыам ыйыгар ахсыс нүөмэрэ тахсыбытын кэннэ тахсыыта тохтуу сылдьыбыт. Аныгыскы нүөмэрэ алтынньы 29 күнүгэр тахсыбыт.

Онтон икки сыл хаһыат биир сүнньүн булбакка сылдьыбыт, О.Д. Якимов суруйарынан "издание «лихорадило»". 1926 сыллаахха «Молодёжь Севера» 12 эрэ нүөмэрэ тахсыбыт. Онно сахалыы тиэкистэрэ биирдиилээн эрэ этилэр. 1927 сыллаахха хаһыат эмиэ нэдиэлэ аайы сахалыы уонна нууччалыы тахсар буолбут. Онтон бэс ыйын 14 күнүгэр нууччалыы тиэкистээх бүтэһик нүөмэр тахсыбыт. 1927 сыл от ыйын 2 күнүттэн барыта сахалыы суруллубут хаһыат «Хотугу ыччат» диэн аатынан ыйга иккитэ тахсар буолбут.