Тюркияҕа 2016 сыллааҕы от ыйынааҕы байыаннай путч

Тюркияҕа от ыйын 15–16 күннэригэр буолбута. Түрк сорох байыаннайдара байыаннай переворот оҥорон Анкараҕа, Стамбулга, Мармариска уонна Малатьеҕа хонтуруолу ыларга соруммуттара. Быһылаан от ыйын 15 күнүгэр, киэһээ саҕаламмыта, бу кэмҥэ Тюркия президена Реджеп Тайип Эрдоган дьиэ кэргэнин кытта Мармариска отельга сынньана сыппыт. Эрдоган отельга саба түһүөхтэрин иннинэ куотан биэрэн от ыйын 16 күнүгэр Стамбулга, өрө туруу хам баттаммытын кэннэ кэлбитэ.

От ыйын 16-гар түүн уонна күнүс Анкараҕа F-16 истребителлэр президент дыбарыаһын уонна парламент дьиэтин буомбалаабыттара. Сарсыарда өттүгэр ити объектары таанкалар штурмалаабыттара. Ону тэҥэ путчистар Стамбуллааҕы, Анкаратааҕы международнай аэропортары, Стамбулга Босфорскай пролив нөҥүө күргэлэри, Анкараҕа бас партия дьиэтин, араас судаарыстыбаннай сулууспа дьиэлэрин, телекомпаниялар офистарын бас билбиттэрэ. Национальнай чуҥнуур тэрилтэ дьиэтигэр уот турбутун туһунан биллибитэ. Сотору кэминэн путчистар телевидение нөҥүө армия Генштаба дойдуга былааһы ылбытын, байыаннай балаһыанньа уонна комендантскай чаас киллэриллэрин эппиттэрэ. Эрдоган ол кэмҥэ былдьамматах телекомпания нөҥүө путч сокуоннайа суоҕун эппитэ, кинини өйөөччүлэри барыларын уулуссаҕа тахсалларыгар ыҥырбыта. Дьон ону истэн уулуссаҕа тахсан путчистарга былааһы ылалларыгар туорайдаһан барбыта. Путч кэмигэр дойду кыраныыссалара сабыллыбыттара, Греция армиятын толору байыаннай бэлэмҥэ киллэрбитэ, бу НАТО историятыгар аан бастаан биир чилиэн атын чилиэни утары дьааххаммыта, армиятын сэриилэһэргэ бэлэмнээбитэ. Аан дойду салалталара путч дойдуга былааһы былдьыырга соруммутун утарарын биллэрбитэ. Дойду полицията, армиятын сороҕо, будун уонна духовенство Эрдоган диэки буолан путчистар былааһы кыайан туппатахтара, авиациялара суулларыллыбыта, сорохторун миэстэлэригэр өлөртөөбүттэрэ, аҕыйах киһи вертолетка олорон Грецияҕа куоппута. Ол кэннэ 9 тыһыынча киһини былаас путчка кыттыбыттарыгар уорбалаан тутуталаабыта. Путч кэмигэр үс сүүсчэкэ киһи өлбүтэ, балтараа тыһыынча бааһырбыта, куораттар уулуссалара саахалламмыттара.