Нуучча-Азия баанын Саха сиринээҕи салаата

Бикипиэдьийэ диэн сиртэн ылыллыбыт
Перейти к навигации Перейти к поиску

Нуучча-Азия баанын Саха сиринээҕи салаата (нууч. Якутское отделение Русско-Азиатского банка) — Дьокуускайга XX үйэ саҕаланыытыгар баар буола сылдьыбыт бөдөҥ үп тэрилтэтэ.

Нуучча-Азия баана 1910 с. Нуучча-Кытай (нууч. Русско-Китайский банк) уонна Хотугу (нууч. Северный банк) бааннар силлэһиилэриттэн баар буолбута. Устааба 1910 сыл от ыйын 30 күнүгэр бигэргэммитэ. Бырамыысыланнас сайдар кэмигэр тахсыбыт буолан уонна үп министиэристибэтэ өйөбүлүн сатабыллаахтык туһанан Арассыыйа саамай улахан бааннарыттан биирдэстэрэ буолбута. Силлэспит бааннартан салаалар, комиссионерстволар уонна ааҕыныстыбалар киэҥ ситимнэрин утумнаабыта. 1910 с. олор ахсааннара Арасыыйаҕа 108, кыраныысса таһыгар — 22 этэ. 1913 с. ахсааннара Арассыыйаҕа 99 уонна кыраныысса таһыгар 18 буолбута, ол төрүөтүнэн олохтоох салаалар кредит биэрэ кыахтарын күүһүрдүү уонна үбү биир сиргэ түмүү буолбута.

Баан Саха сиринээҕи салаата уобаласка хапытаал сыһыана ирэ-хоро киириитигэр, ырыынак ситимэ атаҕар туруутугар, атыыһыт монопуолдьуйалара күүһүрүүлэригэр төһүү күүс буолбута.