Мыреева Татьяна Ивановна

Мыреева Татьяна Ивановна

Татьяна Ивановна Мыреева — П. А. Ойуунускай аатынан Саха академическай театрын артыыһа.

Олоҕун олуктара

• Муус устар 10 күнүгэр 1928 с. Ленскэй оройуон Бэтинчэ нэһилиэгин Курум сэлиэнньэтигэр төрөөбүт.
• 1955 сыллаахха М. С. Щепкин аатынан Үрдүкү Москватааҕы театральнай училище саха студиятын драма артыыһын идэтигэр үөрэнэн бүтэрбит.
• 1955 сылтан — П. А. Ойуунускай аатынан Саха академическай театр артыыһа.

Айар үлэтэ

Саха театрыгар бастакыннан Джульеттаны оонньообут (1955). Иккис ситиһиитэ — 1956 сыллаахха Суорун Омоллоон «Күкүр ууһугар» Күннэй оруолун толоруута буолбута. Үчүгэй куоластаах буолан М. Н. Жирков уонна Г. Литинскэй «Ньургун Боотур» олоҥхолоругар бастакынан Кыыс Кыскыйдаан партиятын толорбута (1957). 1961 сыллаахха Г. Григорян «Сир симэҕэ» опереттатыгар Татыйык партиятын толорбута.

Т. И. Мыреева ситиһиилээхтик Зербинетта («Плутни Скапена» Ж. Б. Мольер), Сыгый Кырынаастыыр (И. Избеков, 1962), Айыы Куо («Кыһыл Ойуун» П. Ойуунускай, 1964), Дездемона («Отелло» В. Шекспир, 1965), Аттене («Пуночка тундры» И. Бочкарев, 1971), Балбаара («Ини-бии» С. Ефремов, 1975), Мылгун ойоҕо («Хаарыан хампа күөх кытылым» Ч. Айтматов, 1982), Шин («Добрый человек из Сычуани» Б. Брехт, 1986), Иэйэхсит («Бүдүрүйбүт», Алампа, 1987). 2003 сыллаахха Амма Аччыгыйа «Сааскы кэм» Даарыйа эмээхсини оонньообута.

Наҕараадалара уонна ытык ааттара

• Саха АССР үтүөлээх артыыһа (1965)
• «Гражданскай килбиэн» ураты Бэлиэ (2005)