Ксенофонтов Павел Васильевич
Павел Васильевич Ксенофонтов — уһулучулаах саха уопсастыбаннай уонна бэлитиичэскэй диэйэтэлэ, саха омугун быраабын туруулаһааччы, 1927-1928 сыллардааҕы конфедералиистар хамсааһыннарын салайааччыта.
Арҕаа Хаҥалас улууһун Тиит Арыытыгар 1890 сыллаахха ыам ыйыгар төрөөбүтэ. Москубатааҕы государственнай университет юридическай факультетын 1917 сыл иннинэ бүтэрэн Москубаҕа адвокатынан үлэлиир. 1922 сыллаахха Харбиинынан сылдьан баран Дьокуускайга кэлэн Үп министиэристибэтигэр 1927 сыллаахха дылы үлэлиир. Бу кэмҥэ Саха автономиялаах Өрөспүүбүлүкэтин стаатуһун сойуус өрөспүүбүлүкэтигэр дылы үрдэтиини, ССРС Национальнастарын Сэбиэтигэр сахалар баар буолалларын, олохтоох былаас уорганнара ордук кыаҕыралларын туруорса сатыыр. Ол сатамматын өйдөөн саалаах-саадахтаах демонстрацияны оҥорорго күһэллэр. 1927 сыл балаҕан ыйын 28 күнүгэр «Саҥа сахалар омуктарын сэбиэскэй социалистыы конфедералиистар баартыйалара» («Младо-якутская национальная советская социалистическая партия конфедералистов») диэн ааттаах баартыйа тэрийэр.
Алтынньыга-сэтинньигэ Ксенофонтов, Артемьев уонна Михайлов салайааччылаах өрө турааччылар Арҕаа Хаҥалас улууһун барытын уонна Илин Хаҥалас улууһун сорҕотун ылаллар. 1927 сыл ахсынньытыгар Ксенофонтов дьоно биэс улууска бааллара, 750 кэриҥэ киһилээхтэрэ.
Ахсынньы 4 күнүгэр Мытаахха, Бор алааһыгар конфедералистар баартыйаларын Киин кэмитиэтэ талыллыбыта. Ксенофонтов генеральнай сэкирэтээр буолбута.
Туһаныллыбыт литература
[уларыт | биики-тиэкиһи уларытыы]- "Кыым" хаһыат, 15.04.2007. "Саха бастакы үрдүк үөрэхтээхтэрэ", Иннокентий Неустроев
 |
Бу киһи туһунан сиппэтэх ыстатыйа. Көннөрөн уонна эбэн биэрэн Бикипиэдьийэҕэ көмөлөһүөххүн сөп. |
 |
Бу ыстатыйаны тупсарарга?:
|