Апатиит
Апатиит — кальций фосфаата, үксүн биир кэлимсэ туораахтыҥы маасса быһыытынан көстөр. Сороҕор боруода иһигэр кыбыллыбыт призма формалаах кристааллар көстөллөр. Дьэҥкирэ суох кристааллар наһаа бөдөҥ буолуохтарын сөп, холобур, Канаадаҕа апатиит 200 киилэттэн тахса ыйааһыннаах, 2 миэтэрэ кэриҥэ уһуннаах призмалара көстүбүттэрэ. Олох сэдэхтик дьэҥкир кристааллар көстөллөр, олортон ювелиирдар араас оҥоһуктары оҥороллор.
Дьэҥкир кристааллар өҥнөрө араҕастан хараҥа халлан күөххэ, фиолет өҥүгэр тиийэ буолаллар. Өҥө суох кристааллары Италияҕа уонна Германияҕа булаллар; «куоска харах» эффектаах таастары Шри-Лаанка уонна Бирма сириттэн булаллар. От күөҕэ апатииттары Алдан тардыытыгар булаллар.