Андреев Юрий Степанович

Бикипиэдьийэ диэн сиртэн ылыллыбыт

Андреев Юрий Степанович ССРС, РСФСР спордун маастара, Саха АССР үтүөлээх тренера, Саха республикатын физкультураҕа уонна спортка үтүөлээх үлэһитэ, 2002 сылтан Ньурба улууһун Бочуоттаах олохтооҕо.


1952 сыллаахха Ньурба оройуонун Бордоҥ нэһилиэгин Марха өрүс хочотугар сытар Улахан Күөл диэн учаастагар колхозтаах кэргэнигэр төрөөбүтэ.

Кини Маалыкай орто оскуолатын бүтэрэн 1975 сылтан оройуонун оскуолаларыгар физкультура учууталынан, тренерынан үлэлээбитэ, салгыы Дьокуускайдааҕы государственнай университет физическэй үөрэхтээһиҥҥэ кафедратын бастаан ассистенынан, онтон старшай преподавателинэн ситиһиилээхтик үлэлээбитэ, онтон 1989 сылтан дойдутугар Ньурбаҕа кэлэн спорт үрдүкү мастерствотын республикатааҕы оскуолатын Ньурбатааҕы филиалын старшай тренер-преподавателинэн үлэлээбитэ, 1994 сылтан Ньурба улууһун администрациятын спортка, туризмҥа отделын, управлениетын начальнигынан тахсыылаахтык үлэлээбитэ. Кини олох эдэр сааһыттан физкультуранан, спордунан улаханнык умсугуйан туран дьарыктаммыта, ордук ситиһиилээхтик спортка саха национальнай көрүҥэ хапсаҕайдаһан тустуу сайдарыгар, Аан дойду таһымыгар тахсарыгар утумнаахтык уонна дьаныардаахтык үлэлэспитэ, бу көрүҥҥэ кини сөҕүмэр ситиһиилэммитэ, ону кини республикаҕа хапсаҕайдаһан тустууга уон алта төгүл абсолютнай чемпион да буолбута туоһулуур.

Кини ССРС-ка, РСФСР-га, Дальнай Востокка уонна Сибииргэ, көҥүл тустууга, хапсаҕайга элбэх төгүл бастаталаан сылдьыбыта.