Егоров Сэмэн (XIX үйэ)

Егоров Сэмэн — Емельян Ярославскай аатынан Дьокуускайдааҕы кыраайы үөрэтэр музей бастакы экспонаатын (Музей эһэтин) булбут саха киһитэ.

Үөһээ Бүлүү улууһун Чочу нэһилиэгэр олохтоох Сэмэн Егоров 1886 сыллаахха бизон төбөтүн уҥуоҕун булбут. Булумньуну Бүлүү куорат (уокурук) исправнига Шахурдин Иркутскайдааҕы музейга ыытарга диэн быһаарбыт, онон онно аадырыстанан Дьокуускайга уобаластааҕы бырабылыанньаҕа кэлбит. Мантан салгыы айанын борогуоннуур биир да тэрилтэ көстүбэккэ, булумньу Уобаластааҕы Статистика кэмитиэтигэр харайыытыгар биэриллибит. Кэмитиэт 1887 сыл олунньу 20 күнүгэр буолбут мунньаҕар муоһу ханна да ыыппакка Дьокуускайга бэйэтигэр тэриллэр музейга анаан хаалларарга быһаарыы ылыммыт. Ол кэмҥэ дылы музейы тэрийии боппуруоһа ханна да, хаһан да көтөҕүллэ илик эбит, онон музей устуоруйатын мантан саҕалыахха сөп. 1887 сыл ыам ыйыгар булумньуну саҥа тэриллэр музейга хаалларар туһунан этиигэ Сэмэн Егоров сөбүлэҥэ кэлбит. Онон булумньу музей бастакы экспонаата буолбута, билигин «Музей эһэтэ» диэн ааттанар.

Сэмэн Егоров бэрт сытыы-хотуу киһи эбитэ үһү. Дойдутугар кини туһунан норуот эмчитин, отоһут, олоҥхоһут быһыытынан олус үчүгэй өйдөбүл билигин даҕаны баар.