Чирков Константин Иванович

Чирков Константин Иванович - "Абый улуу кырдьаҕаһа", "Эһэккэ", "Эһэккэбит" диэн Саха сиригэр ааттанар XX үйэҕэ олоро сылдьыбыт эмчит, ойуун.

Үөһээ Дьааҥы уездын Элгэс улууһугар Арыылаах диэн сиргэ (билигин Абый улууһа) 1879 с. бэс ыйын 3 күнүгэр төрөөбүт. Аҕата Чолоох Уйбаан, ийэтэ - Евдокия, түөрт оҕоттон үһүстэрэ (атыттара кыргыттар).

1974 сыллаахха от ыйын 15 күнүгэр өлбүт.

Төрүччүтэ

Көлүөнэ	Киһи аата
1	Ефим Чирков (1779 с.т.)
2	Семен Кусочин (1807 с.т.)
3	Климонт Чирков (1835 с.т.)
4	Иван Чирков
5	Иван Трофимович Чирков (Чолоох)
6	Константин Иванович Чирков
7	Александра Константиновна Чиркова

Ефим Чирков бииргэ төрөөбүт улахан убайа Платон Черемхин (1771 с.т.) управа быыбарынайынан үлэлээбит, онтон дэһээтинньиктээбит. Иккис Байдун нэһилиэгэ тэриллибитигэр староста буолбут. Ефим Чирков бэйэтэ Н.Ефимов кулубаҕа быыбарынайынан үлэлээбит. Платон Черемхин уола Степан эмиэ нэһилиэк ыстаарастата буола сылдьыбыт, оттон сиэннэрэ Ньукулай уонна Баһылай улуус кулубалара буола сылдьыбыттар.

Кыыһа Александра суруйарынан омугунан саха буолан баран бэйэтэ курууксахалар ол дойдуга тиийиэхтэрин иннинээҕи түҥ былыргы дьоҥҥо эмиэ сыһыаннааҕын кэпсиир эбит. Хотугу тылларынан барыларынан кэпсэтэр, онтон кыырарын кэмигэр сороҕор ханнык эрэ биллибэт тылынан саҥарар эбит. Маны кэлин олохтоох кырдьаҕастар хоро тыла диэн кыыһыгар быһаарбыттарын кинигэтигэр ахтар.

Кини туһунан кинигэлэр

• Улуу ойуун олоҕуттан. Ильяхов П.Н., 1993, Дьокуускай, 15 000 экз.
• Из жизни великого шамана. Ильяхов П.Н., нууччалыы тылбааһы Руфов С.Т. оҥорбут, 1994
• Великий Абыйский Старец и другие. Обутова-Эверстова М.
• "Отец" телефильм. Дмитриева Н., Раевская Г., Неустроев П.
• Мой отец - шаман. А.Чиркова, 2006 - 144 с.