Уу-хонуу харамайдара

Уу-хонуу харамайдара (лат. Amphibia, нууч. земноводные).

Уу-хонуу харамайдара түөрт атахтаахтар, сыгынньах тириилээхтэр. Маарга, нүөл ойуурга, күөлгэ, сыһыыга олох-суйаллар. Тириилэрэ бэйэтиттэн салыҥы таһаарар. Ол иһин мэлдьи инчэҕэй буолаллар. Бу харамайдар икки эйгэни кытта (ууну, хонууну) ыкса ситимнээхтик олохсуйбуттар. Уу, хонуу харамайдара 2 тыһыынча кэриҥэ көрүҥнээхтэрэ биллэр.

Үгүстэрэ итии уонна сииктээх климаттаах дойдуларга үөскүүллэр. Уу-хонуу харамайдара балык кэриэтэ искэхтэн тахсаллар. Саха сиригэр алчахтар үс көрүҥнэрэ баар: бороҥ баҕа, суптугур тумустаах баҕа, оттон кутуруктаахтартан — түөрт тарбахтаах тыймыыт.

Суптугур тумустаах баҕа дойдубут соҕуруу эрэ өттүгэр уонна Алдан өрүс сүнньүнэн баар.

Уу-хонуу харамайдарын биир көрүҥэ тыймыыт буолар. Кини устата 12–13 см тиийэр. Кэлин атаҕа 4-түү тарбахтаах. Тымныыны олус тулуйумтуо. Нуул, икки кыраадыс тымныыга тоҥмот, бултуур-алтыыр. Күн уотун сөбүлээбэт. Итиигэ, сырдыкка өлөр.

Баҕа, тыймыыт айылҕаҕа уонна киһиэхэ элбэх туһалаах: тыа хаһаайыстыбатыгар буортуну оҥорооччуну, киһиэхэ-сүөһүгэ араас ыарыыны тарҕатар үөнү-көйүүрү суох оҥорор.