Сыалаахтааҕы эрдэтээҥи неолит култуурата

Сыалаахтааҕы эрдэтээҥи неолит култуурата эбэтэр Сыалаах култуурата - эрдэтээҥи неолит саҕана (биһиги эрабыт иннинэ 6000-4900 сс.) баар буола сылдьыбыт археология култуурата. Сабаҕалааһын быһыытынан 1000 сыл тухары баар буола сылдьыбыт. Аатын Эдьигээнтэн 90 км тэйиччи сытар Сыалаах күөл аатыттан ылбыт. Ол күөл таһыгар 1945 с. А.П. Окладников былыргы дьон олохсуйа сылдьыбыт сирдэрин булбута.

Онно олоро сылдьыбыт дьоннору Сыалаахтар диэн ааттыыллар. Сыалаахтар аан бастаан таас үйэ саамай кыахтаах булдун сэбин - ох сааны, уҥуохтан оҥоһуллубут атаралары, керамиканы (уокка сиэтиллибит сиэккэ ойуулаах туой иһиттэри) туттубуттар. Тааска ойууларыгар тайах элбэхтик көстөрүн иһин тайаҕы таҥара курдук көрөллөр эбит диэн сабаҕалыыллар.