Скаут аан дойдутааҕы күнэ

Скаут аан дойдутааҕы күнэ (ааҥл. [World] Scouts' Day) — 1910 сыллаахтан бэлиэтэнэр. Скауттар (бойскауттар, герлскауттар) (ааҥл. Scouts — Boy Scouts, Girl Scouts) диэн оҕолор хамсааһыннара, 6 сааһыттан 18-21 саастарыгар диэри оҕолор кытталлар. Билигин аан дойдуга 38 мөлүйүөн кэриҥэ киһи 217 дойдуга бу хамсааһыҥҥа кыттар.

Төрүттээччиннэн генерал-майор Роберт Баден-Пауэлл (ааҥл. Robert Baden-Powell, 1857–1941) ааҕыллар, кини Соҕуруу Африкаҕа сулууспалыы сылдьан олохтоох оҕолортон этэрээт тэрийбит, онтун сэриигэ туһаммыт, ол уопутун кэлин аармыйаттан уурайан баран дойдутугар олорон «Scouting for Boys» (сах. Разведка уолаттарга) диэн кинигэтигэр кэпсээбит. Бастакы скаут оҕолор лааҕырдара Англияҕа 1907 сыл сайыныгар аһыллыбыта. Арассыыйа импиэрийэтигэр 1909 сыллаахха баар буолбута. Ол эрээри 1924 сыллаахха бобуллубута. Кини үгэстэрин сорҕотун Пионер хамсааһына ылбыта (холобур "Бэлэм буол!" — ааҥл. Be prepared! — девиһин, хаалтыс бэлиэтин иҥин). 1990 сыллаахха скаут хамсааһына Арассыыйаҕа сөргүтүллүбүтэ.