Семенов Сергей Иннокентьевич
Семенов Сергей Иннокентьевич — Саха сиригэр быар сыстыганнааах ыарыыларын чинчийэр учуонай, ХИФУ Мэдиссиинэ институтун Чинчийэр киинин үлэһитэ, СӨ доруобуйатын харыстабылын туйгуна, мэдиссиинэ билимин дуоктара.
1960 сыллаахха муус устар 1 күнүгэр Эдьигээҥҥэ төрөөбүтэ. Аҕата Иннокентий Степанович Куонараттан төрүттээх Орбодо ойуун (Семенов Степан Семенович) уола этэ, ийэтэ Мария Афанасьевна Иван Канин диэн Иркутскайтан төрүттээх сыылынай сиэнэ.
Төрөппүттэрэ эрдэ өлөннөр икки убайын уонна эдьиийин кытта эбэтигэр Филиппова Ульяна Гаврильевнаҕа иитиллибиттэрэ. Убайа, киниттэн уон сыл аҕа Иннокентий медфакка үөрэнэ сылдьан үһүс куурустан ыараханнык ыалдьан уурайбыта, ону таһынан ыалдьа сытар ийэтин көрөр этэ. Онон оскуолаҕа үөрэнэ сылдьар быраатыгар Сергейгэ, дьонуҥ уонна эбэҥ баҕатын толорон хайаан да быраас буолуохтааххын диэн эппитэ идэтин таларыгар көмөлөспүтэ.
Өр сылларга Дьокуускай 1 нүөмэрдээх клиническэй балыыһатыгар Инфекционнай отделениеҕа үлэлээбитэ, уустук ыарыһахтары эмтээн санитарнай авиацияннан Саха сирин улуустарын барытын кэрийбитэ. Булуҥ улууһун кылаабынай бырааһынан үлэлээбитэ.
2000 сыллаахха Санкт-Петербурга Д гепатит тиэмэтигэр мэдиссиинэ билимин хандьыдаатыгар диссэртээссийэ көмүскээбитэ. В, С уонна дельта гепатиттар Саха сиригэр уратыларын чинчийэн, 2007 сыллаахха Москубаҕа ол үлэтин ситиһиилээхтик көмүскээн билим дуоктара буолбута.
Тас дойдулар уонна Арассыыйа учуонайдарын кытта элбэх чинчийиилэри ыытан, ол түмүгүнэн араас таһымнаах кэмпириэнсийэлэргэ дакылаат оҥортуур, аан дойду уонна Арассыыйа билим сурунаалларыгар ыстатыйалара тахсаллар.