Романов Петр Петрович

Романов Петр Петрович (1902–01.05.1952) — сахалартан бастакы идэтийбит худуоһунньук, Саха АССР норуодунай худуоһунньуга.

Олоҕун олуктара

• 1902 с. ыам ыйыгар Боотурускай улууһун Мэлдьэхси нэһилиэгэр төрөөбүтэ.
• 1927 с. Москубатааҕы ускуустуба рабфагын бүтэрбит.
• Онтон 1934 с. Москубатааҕы ойуулуур искусство институтун литография салаатын бүтэрбит. Онно аатырбыт Д. С. Моор уонна А. А. Дейнека диэн худуоһунньуктарга үөрэммитэ.
• 1936–1937 сс. нуучча драматическай тыйаатырыгар үлэлиир.
• 1938–1939 сс. Москубаҕа квалификациятын үрдэтиммитэ.
• 1939–1940 сс. Саха судаарыстыбаннай тыйаатырын сүрүн худуоһунньуган үлэлээбитэ.
• 1943–1948 сс. Худуоһунньуктар сойуустарын правлениетын председателя.
• 1945 с. кини инициативынан, туруорсуутунан уонна тэрйииитинэн Дьокуускайдааҕы художественнай училище аһыллыбыта.
• 1952 с. ыам ыйын 1 күнүгэр Дьокуускайга өлбүтэ.

Айар үлэтэ

Араас жанрдарга бэйэтин боруобалаабыта: политическай плакатка, карикатураҕа, кинигэ ойуулааһыныгар, тыйаатыр декорациятын исскуствотыгар, сэлии муоһуттан оҥоһуктарга. Живописька «Колхуос ыһыаҕа» диэн бастакы жанровай хартыынаны 1937 с. суруйбутунан биллэр. «Боотур сүгүннэрбит кыыһын кытары» (1938) хартыыната саха искусствотын көмүс фондатыгар киирэр. 1943 с. «Баланов лейтенант» хартыынаны суруйар. Саха историятыгар аналлаах хартыыналардаах.

Наҕараадалара уонна ытык ааттара

• Саха АССР норуодунай худуоһунньуга
• «За доблестный труд в Великой Отечественной войне» мэтээл (1945)
• Саха комсомолун бириэмийэтин лауреата (өлбүтүн кэннэ, 1967)

Аатын үйэтитии

1995 сылтан кини аатын Дьокуускайдааҕы художественнай училище сүгэр.

Өссө маны көр

• Саха норуодунай худуоһунньуктарын тиһигэ

Сигэлэр

• Национальная библиотека Республики Саха (Якутия):100 лет со дня рождения П. П. Романова, народного художника ЯАССР Архыыптаммыт 2017, Кулун тутар 27 күнүгэр.
• Исторический, культурологический журнал «Илин», № 2(29) — 2002:«Искусство наше как бы расчленилось…»