Оконешников Василий Николаевич

Оконешников Василий Николаевич 1932 с. Мэҥэ – Хаҥалас улууһугар Нөөрүктээйи нэһилиэгэр төрөөбүтэ. Саамай үрдүкү категориялаах уруһуй, черчение учуутала. 1958-1963 сс. Аллараа – Бэстээх 7 кылаастаах, Майа орто оскуолаларыгар үлэлээбитэ. 1963-64 үөрэх сылыттан Павловскай орто оскуолатыгар айымньылаахтык үлэлиир. Черчение, уруһуй кабинетын республикаҕа бастакынан тэрийбитэ. Бары билиитин – көрүүтүн оҕо техническэй, художественнай дьоҕура сайдарыгар туһаайан үлэлиир. 1963 с. саҕалаан биир да сыл тохтообокко «Эдэр чертежник» куруһуогун үлэлэппитэ (1999 с. учууталлыырыттан уурайан куруһуок салайааччытынан үлэлиир). Учууталларга уонна маассабай ааҕааччыларга аналлаах 5 кинигэ программа автора. «Кабинет черчения» - Москва, Просвещение издательствоҕа 1984 с., «Всей душой и сердцем», «Раздаточные тематические таблицы по черчению» - Дьокуускай, «Бичик» издательствоҕа 1999-2001 сс., «Үөрүү аргыстаах үлэ» - Дьокуускай, 2005 с., «Төрөөбүт дойдубар тапталым» - Дьокуускай, 2008 с. Черчение куруһуогун 45 сыл салайан үлэлээн кэлбит сылларыгар элбэх саҥаны киллэрбитэ. Куруһуокка бэриллэр сорудахтары, задачалары чертежтаан оҥорорго, суруйарга аналлаах А4 формакка тэҥнээх размердаах, туспа көрдөбүллэрдээх анал үлэлиир тэтэрээт, электрическэй уотунан үлэлиир стендэлэри, викториналары, таблицалары, тренажердары өйтөн оҥорору саҕалаабыттара. «Тестер» экзаменатор по черчению» диэн прибору оҥорбуттара республикаҕа ыытыллыбыт үөрэнээччилэр техническай айымньыларын быыстапкатыгар 1980 с. бастаан бу үлэ автора 9-с кылаас үөрэнээччитэ Гоша Кириллин эдэр конструктор Бүтүн Россиятааҕы 7-с слеттарыгар кыттан үлэтэ биһэрибил премиянан I степеннээх дипломунан наҕараадаламмыта. Павловскай оскуолатын чертежниктэрэ республикаҕа ыытыллыбыт олимпиадаларга 30 сыл субуруччу бастаабыттара, ону сэргэ Бүтүн Россиятааҕы олимпиадаларга тэҥнэһэр Грузияҕа кэтэхтэн ыытыллар олимпиадаларга 10 сыл устата ситиһиилээхтик кыттыбыттара. Иллэҥ кэмигэр айылҕаҕа сылдьарын бултуурун, балыктыырын, оттуурун сөбүлүүр, айылҕаны уруһуйдуур, хоһоон айарга холонор. «Эркээйи» хаһыат общественнай корреспондена, РСФСР норуотун үөрэҕириитин туйгуна (1969 с.), «Үрдүк учуутал» аат иҥэриллибитэ (1982 с.), Саха Республикатын оскуолатын үтүөлээх учуутала (1983 с.), «Саха – Азия оҕолорун» стипендиата (1995 с.), Саха Республикатын «Учууталлар учууталлара» аат (2000 с.), Нөөрүктээйи нэһилиэгин, Мэҥэ – Хаҥалас улууһун Бочуоттаах олохтооҕо, тыыл, педагогическай үлэ бэтэрээнэ. 2016 с. Павловскай оскулатыгар кини аатын иҥэрбиттэрэ. Василий Николаевич кэргэнинээн Надежда Никитичналыын (идэтинэн медик) 4 оҕолоохтор, улахан уол Михаил тутуу инженерэ, Василий биолог-орнитолог, Александр тутуу үлэһитэ, кыыстара Светлана быраас-терапевт, элбэх сиэн амарах эбээлэрэ, эһээлэрэ.