Николай Николаевич Окоемов

Бикипиэдьийэ диэн сиртэн ылыллыбыт
Перейти к навигации Перейти к поиску

Николай Николаевич Окоемов биир бастакы ревком, хорсун партизан, улахан партийнай, советскай үлэҺит этэ. Кини бэйэтэ дьикти эйэҕэс майгылаах, туспа имигэс стиллээх үлэһит этэ. Киһини астыннарар, киһиэхэ ытыктанар салайааччы, үтүө доҕор быһыытынан биллэрэ. Николай Николаевич урукку Бороҕон улууһугар, Курбуһах нэһилиэгэр, элбэх оҕолоох, быстар дьадаҥы дьоҥҥо төрөөбүтэ. Үлэни кыайбат, элбэх кыра кэргэттэри ийэлэрэ, аҕалара, үксүгэр ыалларга сүөһу көрөн, сир-солоон, от-мас тиэйэн иитэллэрэ. Кыһалҕаны көрбүт ийэ, ыарыһах буолан эрдэ өлбүтэ. Кини өлөрүгэр аҕыс оҕо тулаайах хаалбыта. Олортон саамай улаханнара 15 саастаах этэ. 1910 сыллаахха, кинилэр олохторуттан чугас сиргэ инородческай народнай оскуола арыллыбыта. Онно оҕолору пансиоҥҥа ылан, бэлэмҥэ олордон уорэтэллэрэ. "Оҕолорбутун хааһына аһатан үѳрэттэрэн баран, биһиэхэ бас биллэриэ суоҕа, ыраахтааҕы сэриитигэр ыытыа", — диэн кыанар ыаллар оҕолорун пансиоҥҥа биэрбэтэхтэрэ. Онон пансиоҥҥа үтүөх-батаах дьадаҥы ыаллар оҕолорун ыыта сатаабыттара. Николай Николаевич ол түбэлтэнэн үөрэххэ киирбитэ. Үс сылынан оскуолатын бүтэрбитэ. 1913 сыллаахха Якутскайга киирэн эрэй бѳҕѳнѳн, кордоһүү-ааттаһыы муҥунан нэһиилэ икки кылаастаах миссионерскай оскуолаҕа ылыллыбыта. Үчүгэйдик үөрэммитэ. Бүргэс сиэпкэ батыа дуо - оччолорго буолар политическай сабыытыйалар сабыдыаллара кини өйүгэр-сүрэҕэр сырдыгы киллэрэрэ. Сытыы тылланара-өстөнөрө. Таҥара үөрэҕиттэн аккаастанан элбэхтик сэмэлэммитэ. Ити 1916-1918 сыллардаахха этэ. 1918 сыллаахха муус устар ыйга, "үөрэнээччилэр забастовкаларын тэрийсибитин иһин" диэн Николай Николаевич оскуолаттан уһуллубута. Дьокуускайга, ити 1918 сыллаахха буолуталаабыт политическай сабыытыйаларга кыттыыны ылбыта. Оччолорго үлэҕэ, олоххо улахан ыйааһыннаах, хара үлэһиттэр союзтарыгар чилиэнинэн киирбитэ. Дойдутугар, Бороҕоҥҥо тахсан, бастаан бэйэтин нэһилиэгэр Курбуһахха нэһилиэк ревкомугар суруксуттаабыта. Онтон 1920-1921 сылларга волревкомна талыллан үлэлээбитэ. Ол кэмҥэ Бороҕоҥҥо бастакы партийнай, бастакы комсомольскай ячейкалар, тэриллибиттэрэ. Онно Н.Д. Мигалкины кытта кини биир актыыбынай тэрийээччи этэ.