Марпыама

Тыл олоҕор сыһыарыылар бэйэ-бэйэлэригэр субуруччу холбонон эбиллэн иһэллэр. Онон маннык тыл тутула хас эмэ өлүүскэлээх буолан тахсар: тыл төрдө (олоҕо) уонна тус-туспа сыһыарыылара. Тыл ити өлүүскэлэрин марпыамалара диэн ааттанар.

Марпыама - тыл суолталаах саамай кыра өлүүскэтэ. Дьиҥэ, тылга саамай кыра өлүүскэ дорҕоон буолуон сөп курдук. Ол эрээри дорҕоон тыл тутулун быһаарар ханнык да тус суолтата суох, оттон сыһыарыы, холобур, саа: тылга -лар элбэх ахсааны көрдөрөр суолталаах, -лаах - "туохтаах" диэн суолтаны эбэр, -м саа миэнэ буоларын көрдөрөр тардыы сыһыарыыта.

Марпыама - морполуогуйа үөрэҕин тутаах өйдөбүлэ. Марпыамалар аналларынан, туттуллууларынан, атын марпыамаларга сыһыаннарынан, суолталарынан тус-туспалар, араастык наарданаллар. Марпыамаларын тутулунан саха тыла түүр тыла буолар. Ону таһынан бэйэтэ туспа көрүҥнээх айылҕалааҕын туоһулууллар.