Көөчүктээһин
Көөчүктээһин диэн кыра оҕоҕо тугу эмэ көрбөтөҕүн, билбэтин, саҥаны көрдөрөн баран биэрбэт буолуу ааттанар.
«Оҕоҕо биэрбэт аата көөчүктээмэ» диэн кырдьаҕас Лөкүө эбэ этэрэ. Тугу эмэ солуну, билбэтин, саҥаны көрдөрдөххө оҕо ону ылар, көрөр санаата улахан буолар. Былдьаһан, ытаан барыан сөп. Көөчүктээн баран биэрбэтэххэ оҕо уоран, ким да көрбөтүгэр ыларга үөрэнэн хаалыан сөп.
Көөчүктээһин диэн оҕоҕо тугу эмэ билбэтин, саҥаны көрдөрөн, ону булууга баҕа санааны үөскэтии, күөдьүтүү ааттанар. Аныгы рекламалар көөчүктээһин араас көрүҥнэрэ буолаллар. Дьон саҥаны, солуну көрөн-истэн баран олору булунууга туруналларын үөскэтэринэн реклама, көөчүктээһин туһата олус улахан.
Көөчүктээһин «Туох барыта икки өрүттээх» диэн этиигэ сөп түбэһэн икки өрүттээх дьайыылаах:
1. Үчүгэйи, олоххо туһалааҕы оҥорууну үтүктүү, батыһыы.
2. Олоххо туһата суоҕу, буортулааҕы, куһаҕаны үтүктүү, тарҕатыы.
Киһи өйө-санаата үчүгэйи оҥорууну батыһан сайдарынан бары дойдулар дьон куһаҕаны оҥороллорун аҕыйатар санааларыттан олору көөчүктүүрү бобо, хаайа сатыыллар. Үчүгэйи уонна куһаҕаны оҕо кыра эрдэҕиттэн таба арааран туһанарга иитиллэрэ, үөрэтиллэрэ төрөппүттэриттэн тутулуга улахан.
Дьиэлэригэр үөрэ-көтө арыгылыыр төрөппүттэр оҕолорун арыгыны иһэр куһаҕан үгэскэ көөчүктээн үөрэтэ сылдьаллар. Хурустаал үрүүмкэлэр лыҥкынас тыастара, үөрүү-көтүү, ырыа-тойук арыгы иһиититтэн элбиирэ кыра оҕо өйүгэр-санаатыгар саҥаны айыы, үгэс буолан иҥэн хаалаллар. Дьиэлэригэр арыгы испэт төрөппүттэр оҕолоро арыгыга ылларбат кыахтара элбэҕэ кыра эрдэхтэринэ арыгы иһэр куһаҕан үгэскэ иитиллибэтэхтэрин биллэрэр. (1,73).
Туһаныллыбыт литература
[уларыт | биики-тиэкиһи уларытыы]- Каженкин И.И. Өй көтүүтэ. - Дьокуускай: ГБУ РС(Я) "Бизнес-инкубатор", 2018. - 152 с.