Контоев Герман Степанович

Бикипиэдьийэ диэн сиртэн ылыллыбыт
Перейти к навигации Перейти к поиску
Александр Контоев

Герман Контоев - көҥүл тустууга аан дойду чемпиона.

Манна кини Сиднейга тустуон иннигэр суруллубут ыстатыйа тахсан турар.

Биhиги уhулуччулаах тустуукпут улахан көбүөргэ 12 сыл устата бэйэтин ыйааhынын ааттаахтарын барытын кытта хастыыта эмэ көрсүбүтэ, илиилэрин-атахтарын билэттээбитэ. Маҥнай тахсан көбүөргэ эриссибит бөҕөстөрө үксүлэрэ тустан бүппүттэрэ олох быданнаата. Холобур, Султан Даудов, Алексей Варламов, Сергей Замбалов, Владимир Тогузов, Валентин Иорданов, Владимир Торговкин, Рэй Джонс курдук ааспыт үйэҕэ хаалбыт биллиилээх тустууктары кытта хабыр киирсиилэрэ номох буолбута ыраатта. Бэйэтин кытта биир кэмҥэ тахсыбыт, аан дойдуга уонча сыл устата хаста эмэ бастыы сыhан баран, туох да улахан ситиhиитэ суох туораабыт иранец Мохаммади, казах Маулен Мамыров ааттара эмиэ улахан көбүөргэ ааттаммат буолбута хас эмэ сыл буолла. Бэл кини кэнниттэн тахсыбыт, "кырыйдыҥ, биhиэхэ мэhэйдээмэ" диэбит Орлан Монгуш, Мурад Рамазанов, Леонид Чучунов, Адхам Ачилов курдук бөҕөстөр кырдьаннар, дэлби хоттороннор, уон иhигэр киирдэхтэринэ баhыыба буолан турар. Арай биhиги киhибит өссө 1992 сылга СНГ дойдуларын күрэхтэhиитигэр 48 киилэҕэ биhиги Василий Гоголевпытын финалга кыайбыт Намик Абдуллаевы кытта Афиныга тустуохтара, өссө сүрүн утарсааччылар буолуохтара! Ама ити буолбат дуо, саха норуотун аатырдаары биhиги улуу тустуукпут, 14 сыл устата улахан көбүөргэ тохпут көлөhүнэ, хорсун санаата! Биhиги ыалдьааччылар сороҕор улахан тустууктарбытын кыайан өйдөөбөппүт, кыаттардахтарына эмиэ хотторбуттар диэн киэр хайыhан кэбиhэбит. Ол эрээри Герман курдук кэннинэн кэхтибэт, саҥа үйэ сиэринэн байар-тайар туhунан толкуйдаабакка, тустууга, бэйэтин дойдутугар бэриниилээх спортсмен суога буоллар, ама биhиги бачча сыл устата тулуйан-тэhийэн аан дойду, Олимпиада күрэхтэhиитин кэтэhиэхпит этэ дуо!

Намик Абдуллаев (Азербайджан) – олимпийскай чемпион (2000). Үрүҥ көмүс (1996), Европа чемпиона. Аан дойду хас эмэ төгүллээх үрүҥ көмүс медалиһа. Германы кытта 1993 сылтан 2000 сылга диэри хаста эмэ тустан тураллар. Герман 2000 сылга Олимпиадаҕа талар күрэхтэһиигэ кинини кыайан, путевка ылбыта. 2001 сылга аан дойдуга кини биирдэ суоҕар, Герман чемпион буолбута! Эһиилигэр 2002 сылга тустууга төннөн иккис буолан соһуппута! 2000 сылтан Германныын көбүөргэ көрсүһэ иликтэр. Барыллааһын 60-40 кини туһатыгар. Александр Захарук (Украина) – Европа түөрт төгүллээх чемпиона, аан дойдуга биирдэ эрэ, былырыын үһүс буолбута. Куруут тустар, эриссэр бөҕөспүт, ол иһигэр Дьокуускайга эмиэ көрсүһэн тураллар. 1998 сылга Европа финалыгар судьуйалар көмөлөрүнэн Германы кыайбыта. 40-60 биһиги кыайыахпыт!

Амиран Карданов (Греция) – Европа чемпиона, Олимпиадаҕа үһүс буолбута. Герман олус элбэхтэ көрсүбүтэ, наар кыайар этэ, арай бары өйдүүбүт 2000 сылга кыайдыбыт диэн үөрэ олордохпутуна, боруонсаны былдьаан ылбытын! Дьиэтигэр-уотугар судьуйалар, ыалдьааччылар (сахалартан ураты) кини диэки буоллахтара. Ол эрээри 40-60 ситисиэхпит Сиднейы! Стефан Аббас (АХШ) – Аан дойду кубогын 2002 сылга кыайыылаҕа. 2001 сылга аан дойдуга Герман бастакы хапсыһыытыгар кыайбыта. 2002 сылга АХШ-ка тиийэн хотторон турабыт! 50-50.

Чикара Танабэ (Япония) – Былырыын аан дойдуга Германы бастакы киирсиитигэр хотон, кыһыылаахтык туораппыта. 50-50. Дильшод Мансуров (Узбекистан) – Аан дойду былырыыҥҥы чемпиона. Саамай куттанар бөҕөспүт. Эдэрэ, түргэнэ бэйэтин киэнэ. 60-40 бииргэ түбэспэппит буоллар ханнык. Рене Монтеро (Куба) – Аан дойду чемпионнара Братиславаҕа Олимпиадаҕа талар күрэхтэһиигэ финалга киирсэн тураллар. Разведкалаан, илиитин-атаҕын үчүгэйдик үөрэтэн турабыт. Кубинецтары, аан дойду чемпионнара да буоллунар, бастаан төһө да хоттордорбут, Олимпиадаҕа иккис көрсүһүүбүтүгэр ыраастык эрэ уурааччыбыт! 40-60. Йогешвар Дутт (Индия) – Братиславаҕа кыл-муччу кыайан Олимпийскай путевка ылбыппыт. Сымсата, сылбархайа бэйэтин киэнэ. 40-60.

Маулет Батыров (Россия), Мохаммед Аслани (Иран), Мартин Берберян (Армения), Геннадий Тулбеа (Молдова) – үчүгэйдик билбэт, көрсө илик, эдэр тустууктарбыт. Арай быраата Александр киирсэн турар, киһи араа-бараа тустар дьоно диэн санааны олохтоон турар. 50-50.