Желобцов Николай Евграфович

Бикипиэдьийэ диэн сиртэн ылыллыбыт
Навигацияҕа көс Көрдөбүлгэ көс

Николай Евграфович Желобцов (27.11.1889—1921) — техническэй хайысхаҕа саха бастакы инженера.

Олоҕун олуктара[уларыт | биики-тиэкиһи уларытыы]

1889 сыллаахха сэтинньи 27 күнүгэр Бороҕон улууһун Өлтөх нэһилиэгэр төрөөбүт. «Маяк» диэн куруһуогу тэрийсэн, силиэстийэҕэ эриллэн, эрэй бөҕөнү көрөр. Дьыала тохтообутун кэннэ Томскайга баран үрдүк үөрэххэ үөрэнэ сылдьан Санкт-Петербурга тиийэн хайа институтугар салгыы Германияҕа Лейпциг куоракка тиийэн үөрэҕин бүтэрэр. Итиннэ кини тимир суол инженерин идэтин ылбыт быһыылаах. 1917 сыллаах сайын Н. Е. Желобцов кэргэннээх, икки оҕолоох Дьокуускайга тиийэн кэлэр, 1921 сыл саҥатыгар «Советскай былааһы утары саагыбары» тэрийдэ диэн Ньукуола таҥаратын дьиэтин таһыгар ытыллар. Техническэй хайысхаҕа саха бастакы инженерин олоҕо ити курдук түргэнник, хомолтолоохтук түмүктэнэр.

Кини саха национальнай интеллигенциятын уһулуччулаах бэрэстэбиитэллэриттэн биирдэстэрэ Гавриил Васильевич Ксенофонтовы кытта реальнай училищеҕа бииргэ үөрэммиттэр, «Маяк» диэн кистэлэҥ куруһуокка тэҥҥэ сылдьыбыттар, кэлин да билсэллэр эбит. Маны таһынан, Н. Е. Желобцов саха норуотугар умнуллубат өҥөлөөх дьонтон биирдэстэрэ, сырдык өйү-санааны саҕааччы, бастакы драматург, суруналыыс, учуонай, общественнай диэйэтэл Василий Васильевич Никифоровы — Күлүмнүүрү кытта ыкса сибээстээҕэ[1].

Быһаарыылар[уларыт | биики-тиэкиһи уларытыы]

  1. Омук сиригэр олохсуйбут сахалар / Иннокентий Неустроев. — Дьокуускай: «Бичик», 2006. — 144 с. — ISBN 5-7696-2475-2

Сигэлэр[уларыт | биики-тиэкиһи уларытыы]

  • «Кыым» хаһыат, 15.04.2007. "Саха бастакы үрдүк үөрэхтээхтэрэ", Иннокентий Неустроев.