Егоров Прокопий Петрович

Егоров Прокопий Петрович 1913 сыллаахха төрөөбүтэ. 1942 сыллаахха Кэбээйигэ үлэлии сылдьан, дьонун кытта да быраһаайдаспакка эрэ сэриигэ ыӊырыллан барбыт. Кини Урал аттыгар Троицкай куоракка үөрэнэн баран, 1943 сылтан Смоленскай уобаластан саҕалаан, Москва, Курскай дуга уонна Украина сирдэригэр тиийэ сылдьыбыт байыас.

Ол курдук, түүҥҥү хапсыһыыга, ыстыыгынан кэйгэлэһиигэ хаста да кыттыбыт. Биир сырыытыгар кыргыһыы хонуутугар бааһыран, өйүн сүтэрэн сыттаҕына, эдэркээн нуучча кыыһа шинелигэр соһон таһааран тыыннаах ордубутун туһунан кэпсиирэ үһү. “Хайдах тыыннаахпын билэн, өлө сытар дьон быыһыттан хостоон таһаарбыта буолуой?!” – диэн саллара. Сэрии ыар тыынын туһунан Прокопий Петрович маннык кэпсиирэ үһү: “Биир да былыта суох ыраас халлааҥҥа күнү көрдөрбөт гына үлтү буомбалааһын, артиллериянан ытыалааһын, буруо-тараа ынырыга... Биир үлтү тэптэрии буора сиргэ түһэ илигинэ, иккис үлтү тэбии буолар. Ол курдук барыта силлиһэн, холоруктанан олороро. Сир ийэ үрдүгэр сыттахха, айаас аты миинэ сылдьар курдук өрүтэ быраҕаттыыр, дьигиһийэр буолара...”

Бу алдьархайдаах сэриини этинэн-хаанынан даҕайсан билэн, 1944 сыллаахха хаҥас атаҕын тобугунан бааһыран, араас госпиталларга эмтэнэн баран, Борокуоппай дойдутугар эргиллэр. Кэргэнинээн Прасковьялыын 5 оҕону төрөтөн, иитэн улаатыннарбыттара. Маҕаһыыҥҥа атыылааччынан, Жданов аатынан колхозка сүөһү үлэтигэр, совхоз буолбутун кэннэ кэргэнинээн “Быраҥаатталаах” кыылы иитэр ферматыгар өр кэм устата үлэлээн үрдүк көрдөрүүлэри ситиспиттэрэ. Бу эбэ кырылас кумахтаах кытылларын, бэс чагдаларын ис сүрэхтэриттэн таптаан уһуннук олорбуттара. Борокуоппай дьиэтэ, итии үүттээх чэйэ, дэлэгэй аһылыга, сылаас оһоҕо бииргэ төрөөбүттэригэр уонна сылдьар ыалдьыкка, хонор хоноһоҕо күндү буолара. Көрдөөх-нардаах кэпсээннэрэ киһини эрэ барытын курдары тардара, умсугутара. Маны таһынан, хас даҕаны бэйэтэ суруйбут тэтэрээт тухары кэпсээннэрдээҕэ. Үөрэхтээҕэ буоллар суруйааччы буолар талааннааҕа. Сэриигэ сылдьыбыт бэлиэтэ – Албан аат III степэннээх орденнааҕа, элбэх мэтээллээҕэ. “В.И.Ленин төрөөбүтэ 100 сылын көрсө Килбиэннээх үлэтин иһин” мэтээл кини эҥкилэ суох үлэтин туоһулуура, оройуон уонна республика элбэх ахсааннаах бочуотунай грамоталардааҕа.

Борокуопай дьонугар-сэргэтигэр аламаҕай майгыта, дьулуурдаах үлэтэ оҕолоругар, сиэннэригэр уонна аймахтарыгар үтүө холобур буолар.