Дьуоһуп

Бикипиэдьийэ диэн сиртэн ылыллыбыт
Дьуоһубу ини-биилэрэ биллилэр. Леон Пьер Урбан Буржуа уруһуйа, 1863 сыл.

Дьуоһуп (ивр. יוֹסֵף‎) диэн Дьаакып уонна Рахил улахан уоллара. Дьуоһуп бииһин төрүттээччитэ. Икки уоллааҕа Эфраим уонна Манасия. Ойоҕун аата Асенат. Дьуоһуп бииһэ Эфраим уонна Манасия биистэринэн салҕанар.

Үөскээһин битигэ кэпсииринэн, Дьаакып уолаттарыттан Дьуоһубу ордук сөбүлүүр эбит. Маны билэн бииргэ төрөөбүттэрэ кинини күнүүлээн абааһы көрбүттэр. Биирдэ Дьуоһуп уон сэттэ саастааҕар ини-биилэрин кытта ыраах хонууга сүөһүлэрин мэччитэ барбыттар. Уолаттар манна сылдьан Дьуоһубу өлөрөргө санаммыттар. Дьолго хата Рувим өлөрбөккө аҥхайга быраҕан хаалларыаххайыҥ диэбит. Онтон Египекка баран иһэр исмаэлит эргиэн харабаанын көрбүттэр. Дьуоһубу харабааннаах эргиэмсиктэргэ атыылаабыттар. Дьуоһуп кыылга былдьаммыт диэн аҕаларыгар албыннаан кэпсээрилэр кини таҥаһын тэкэ хаанынан сыбаабыттар. Египекка тиийэн баран эргиэмсиктэр Дьуоһубу Потифар диэн биир тойон киһиэхэ атыылаабыттар. Дьуоһуп кини дьиэтигэр чаҕар буолбут. Потифар ойоҕо Дьуоһуптуун хоонньоһуон баҕарбытын кини сөбүлэспэтэх. Ону дьахтар кыыһыран Потифарга сымыйанан үҥсэн Дьуоһубу түрмэҕэ хаайбыттар. Дьуоһуп икки киһилиин хаайыллыбыт - бурдукчуттар тойонноро уонна фараон арыгы кутааччыта. Кинилэр түүллэрин таба билгэлээбит ким өлөрүн ким босхолонорун. Бурдукчуту ыйаабыттар. Арыгы кутааччыны буруйун сотон түрмэттэн босхолообуттар уонна үлэтигэр төттөрү анаабыттар. Икки сылынан фараон дьикти түүлү түһээбит - өрүс хочотугар сэттэ эмис ынах мэччийэ сылдьаллар, онтон өрүстэн сэттэ ырыган ынах тахсан сэттэ эмис ынаҕы сиэн кэбиһэллэр. Фараон "ким мин түүлбүн тойоннуон сөбүй?" диэбит. Арыгы кутааччы Дьуоһубу санаан кэлэн фараоҥҥа кини туһунан кэпсээбит. Дьуоһубу фараоҥҥа аҕалбыттар. Дьуоһуп фараон түүлүн маннык тойоннообут - кэлэр сэттэ сыл астаах сыллар буолуохтара, онтон кэлэр сэттэ сыл сут сыллара буолуохтара. Фараон киниэхэ итэҕэйбит. Кэлэр сут сылларыгар хаһаастарда бэлэмнээҥ диэн дьаһаллаабыт. Дьуоһуп билгэтэ барыта туолбут. Бу иһин фараон Дьуоһубу Египет үрдүкү салайааччытынан анаабыт уонна Потифера диэн Хелиополис аҕабыытын кыыһын Асенаты ойох биэрбит. Сут иккис сылыгар Дьуоһуп ини-биилэрэ Египекка ас көрдүү кэлбиттэр. Дьуоһуп кинилэри көрсөн кэпсэппит ким буоларын арыммыт. Ини-биилэрин барыларын бырастыы гыммыт бары эйэлэспиттэр. Кырдьаҕас аҕатын Дьаакыбы уонна кини удьуордарын барыларын Египекка көһөртөрбүт. Дьэбэриэйдэр фараон көҥүлүнэн Гошен диэн сиргэ олохсуйбуттар. Бу курдук Дьуоһуп бар дьонун суттан быыһаабыт, саҥа дойдуга кинилэргэ көмө-тирэх буолбут. Дьэбэриэйдэр Египекка этэҥҥэ олорон ууһаан-төрөөн элбээбиттэр. Дьуоһуп 110 сааһыгар өлбүт. Кэлин Египеттан барыыга Моисей Дьуоһуп өлүгүн ылан Ыһыраайыл сиригэр илдьэ баран көмпүтэ.