Алексеев Семен Михайлович

Алексеев Семен Михайлович - «Горнай улууһа» муниципальнай оройуон Ытык олохтооҕо.

Тохсунньу 28 күнүгэр 1937 c. Маалтааны нэһилиэгин Куудук учаастагар дьадьаҥы дьиэ кэргэнигэр төрөөбүтэ. 1954 с. Кэптин 7 кылаастах оскуолатын бүтэрбитэ. Оскуола кэнниттэн биир сыл табаһыттаабыта, 1956-1959 сс. Советскай Армия кэккэтигэр Чита уобалаһыгар сулууспалаабыта. Армияттан кэлэн баран, табаһыттар биригээдэлэригэр биригэдьииринэн 1964 с. дылы үлэлээбитэ. Ити сыл Дьокуускай куоракка 1№-дээх СПТУ-га суоппардар куурстарыгар үөрэммитэ, бүтэрэн баран суоппар ыарахан эриирдээх-мускуурдаах, ол эрээри чиэстээх-бочуоттаах үлэтин саҕалаабыта.

Бастаан ГАЗ-66 массыына уруулугар олорбута. Кэптин-Маҥаны икки ардыларыгар колхоз иһинээҕи наадаҕа сүүрдүбүтэ, хас да сыл бензин таһар массыынаҕа ситиһиилээхтик улэлээн коммунистическай үлэ ударигын аатын ылбыта. 1967-1997сс. отут сыл устата уу баһар массыынаҕа суоппардаабыта. Семен Михайлович оройуон үрдүнэн социалистическай куоталаһыыны көҕүлүүрэ, ол иһин оройуон саамай чулуу суоппардарын ортотугар аата ааттанар буолбута. Саҥаттан сана кирбиилэри дабайыы, техника күүһүн муҥутуурдук туһаныы, айаҥҥа саахала суох сылдьыы кини үлэтин уонна олоҕун биир тутаах көрдөрүүтэ буолбута.

Билигин бочуоттаах сынньалаҥҥа олорор, кэргэнинээн 6 оҕону иитэн, 16 сиэннээх, 3 хос сиэннээх.

Наҕараадалара

Семен Михайлович өр сыллааҕы үлэтэ үрдүктүк сыаналаммыта: 1979-1986 cc. онус уонна уон биирис пятилетка кыайыылаҕа знактар, 1986 c. «Үлэҕэ килбиэнин иһин» мэтээл, 1997 с. «Үлэ ветерана мэтээл», үс төгүл Саха АССР Верховнай Советын президиумун Бочуотунай грамоталара.

1995 сс. 98 №-дээх алтынньы 19 күнүгэр улуус дьаһалтатын баһылыгын уурааҕынан Горнай улууһун Бочуоттаах гражданинын аата иҥэриллибитэ.