Шадринова Ангелина Николаевна

Шадринова Ангелина Николаевна — Суоһааны — араадьыйа суруналыыһа, саха устуоруйатын чинчийээччи, бэйиэт.

1963 сыллаахха ыам ыйын 2 күнүгэр Сунтаар оройуонун Толоонугар төрөөбүтэ. Бүлүү педагогическай училищетын бүтэрбитэ. СГУ үөрэнэн 1996 сыллаахха педагог-психолог идэтин ылбыта. Толоон бастакы сүһүөхтээх оскуолатыгар уонна Сунтаар улуустааҕы бибилэтиэктигэр үлэлээбитэ, 1999 сылтан 2005 сылга диэри улуус киин бибилэтиэкэтин кыраайы үөрэтэр "Ситим" сиэктэрин сэбиэдиссэйэ.

Билигин "Саха" НКИХ араадьыйа эрэдээксийэтигэр үлэлиир. Субуота аайы тахсар "Санаа сэргэтэ" диэн устуоруйаҕа аналлаах биэриини оҥорон таһаарар, ыытар.

Айар уонна чинчийэр үлэтэ

Хоһоону 1996 сыллаахтан суруйар. «Сунтаар сонуннара» хаһыакка ол сылтан бэчээттэнэр буолбута. 2001 сыллаахха хоһооннорун «Саха сирэ» хаһыат бэчээттээбитэ. 2002 с. "Ситтэрбэт мин бэйэм..." диэн аудиокассета таһаарбыта, онно бэйэтин хоһооннорун аахпыта, кини хоһоонноругар суруллубут ырыалары киллэрбитэ. Бибилэтиэкэҕэ үлэлиир кэмигэр НКИХ "Саха" Сунтаардааҕы салаатын иһинэн олохтоох тэлэбиидэнньэҕэ "Ситим" диэн суруйааччылар тустарынан биэрии таһаарар этэ. «Мин биллибэт мунчаарыым» хомуурнньуга 2004 сыллаахха тахсыбыта.

2005 сыллаахха "Ким да умнуллубат, туох да умнуллубат" кинигэ иккис туомугар Иккис аан дойду сэриитин кэмигэр Сунтаарга буолбут хоргуйуу туһунан матырыйааллары хомуйар уонна суруйар бөлөх салайааччыта этэ. Алексеева Н.Н. кытта кыттыһан 2006 сыллаахха норуодунай бэйиэт Леонид Попов туһунан уонна 2008 сыллаахха бэйиэт Альберт Бүлүүйүскэй туһунан кинигэлэри таһаарбыта.

Хоһооннорун хомуурунньуктара «Санаа хараҕа» 2007 с., “Дорҕоон кута” 2011 с., «Сэттис аан» 2014 сыллаахха тахсыбыттара.

2013 сыллаахха “Айыы санаа оһуора” диэн ааттаах оҕолорго аналлаах остуоруйалары таһаарбыта.