Үөһээ Бүлүү Исиидэр Бараахап аатынан 1 №-дээх орто оскуолата
Үөһээ Бүлүү Исиидэр Бараахап аатынан 1 №-дээх орто оскуолата - Үөһээ Бүлүү киинигэр баар улуус бөдөҥ оскуолата. 1876 сыллаахха аһыллыбыта. 1947 сыллаахха орто оскуола буолбута.
1957 сыллаахха РСФСР Үрдүкү Сэбиэтин бөрөсүүдьүмүн уурааҕынан аатырбыт судаарыстыба уонна бэлиитикэ диэйэтэлэ, экэнэмиис Исидэр Бараахап аата иҥэриллибитэ. 50-с сыллар бүтүүлэригэр оскуолаҕа массыынаны, тыраахтары үөрэтии, радиоэлектроникану уонна киномеханиканы үөрэтии саҕаламмыта. Бу саҕалааһын уопута өрөспүүбүлүкэ оскуолаларыгар тарҕатыллыбыта. 1966 сыллаахха өрөспүүбүлүкэҕэ аан бастаан физмат кылаас аһыллыбыта. Бу кэлин ССРС норуодунай учуутала буолбут Михаил Андреевич Алексеев уонна оскуолаҕа отуттан тахса сыл дириэктэрдээбит Дмитрий Спиридонович Спиридонов тэрийиилэрэ этэ. Мантан өрөспүүбүлүкэтээҕи физмат хамсааһын саҕаламмыта.