Старостин Николай Петрович – Батаҥа Ньукулай

Олоҕун олуктара

Старостин Николай Петрович 1873 сыллаахха Нөөрүктээйи нэһилиэгин, Тиис Будгуйтар уустарыгар, нэһилиэк илин өттүгэр Бэттиэмэ, Илин Сумуу эҥээрдэригэр төрөөбүт. Икки уоллааҕа, биир кыыстааҕа үһү.

Николай Петрович Нөөрүктээйи дьонугар-сэргэтигэр талааннаах ырыаһытынан, олоҥхоһутунан, сээркээн сэһэнньитинэн, дэгиттэр ууһунан биллэрэ. Уола Николай Николаевич кэпсииринэн, аҕатын олоҥхолорун суруйааччылар хаста да кэлэн устан барбыттар. Ол курдук 1937 сыллаахха Улуу Ойуунускай Нөөрүктээйигэ Ой-Бэскэ нэһилиэк олоҥхоһуттарын мунньан 3-4 күн устата суруйбут. Онно араас олоҥхоһуттар, сахалыы ырыаһыттар ыҥырыллыбыттарыттан, Батаҥа Ньукулай ырыатын-тойугун, куолаһын сэргии истибитэ диэн кэпсииллэр. Ол билигин ханнык архивка харалла сытара биллибэт.

Батаҥа Ньукулай «Төрүөт Бэргэн» олоҥхотун Горнай улууһун Солоҕонуттан төрүттээх, учуутал Семен Сергеев суруйан сурукка тиһэн хаалларбыт. Семен Григорьевич кэлин репрессияҕа түбэһэн ыар дьылҕаламмытын кэннэ, фольклорист Петр Никифорович Попов олоҥхону ситэрэн бэчээккэ бэлэмнээбит. «Төрүөт Бэргэн» олоҥхону аахпыт, ырыппыт чинчийээччилэр, суруйааччылар николай Старостин талааннаах, бэйэтэ туспа ураты айар дьоҕурдаах, баай хомоҕой тыллаах-өстөөх, дириҥ өйдөөх-санаалаах олоҥхоһут быһыытынан сыаналыыллар.

Николай Петрович 1960 сыллаахха 87 сааһыгар өлбүт.

Сигэлэр

• Старостин Николай Петрович "Төрүөт Бэргэн" олоҥхо. Дьокуускай. 2013.