Слепцов Андриан Семенович
Слепцов Андриан Семенович (30.07.1916 – 19.05.1999) — Майатааҕы, Үөһээ Бүлүүтээҕи тыйаатырдарга уонна Саха тыйаатырыгар үлэлээбит артыыс, ССРС култууратын туйгуна, Саха АССР үтүөлээх артыыһа.
Чурапчы улууһун Бахсы нэһилиэгэр төрөөбүтэ. Ийэтэ кини үс саастааҕар өлөн, аҕата Семен Федорович уонна эдьиийэ Христина Федоровна Слепцовтар, Саха тыа ыалыгар улааппыта. Төрүт былыргытын ылан эттэххэ, Слепцовтар аймах Туобуттан төрүтээх Намылдьыйа Бүөтүр диэн киһиттэн ууһаабыт дьон буолаллар эбит.
1935 сыллаахха Саха тыйаатырыгар тыйаатыр-устуудьуйаны бүтэрэн баран, Андриан Семенович оччолорго саҥа тэриллибит Майатааҕы Государственнай холкуос тыйаатырыгар артыыһынан анаммыта. «Ини-биигэ» - Миша, «Ситим быстыытыгар» - Бүөтүр оруолларын, «Айаалга» – Күн Чөмчүүк, «Хардыыларга» - Кэтириис оруолларын ситиһиилээхтик оонньообута биллэр.
1936 сыллаахха Татьяна Ивановна Слепцованы (Сергучева) кытта ыал буолбуттар.
Майатааҕы Государственнай колхуоһунай театрга Саха искусствотыгар кэлин киэҥник биллибит дьон үлэлээбиттэрэ. Театр 16 драманы туруорбута. Олору туруорарга режиссердар Спиридон Алексеевич Григорьев, Василий Васильевич Местников үлэлэспиттэрэ. Ол курдук өрө күүрүүээхтик үлэлии сырыттахтарына, сэрии ааҥнаабыта. Онно театр эр дьоно тутуспутунан кэриэтэ фроҥҥа барбыттара.
Андриан Семенович армияҕа 1941 сыл атырдьах ыйыгар ыҥырыллыбыта. Читаҕа байыаннай үөрэххэ сылдьан сэриигэ барар эшелоннары арыаллыыра. Онтон байыаннай-политическай училищены бүтэрэн, младшай лейтенант званиялаах политрук буолан тахсыбыта. Венаны, Брнону, Будапеһы, Праганы босхолоһуҥҥа кыттыбыта. Онтон Японияны кытта сэриигэ кыттар. 1946 с. диэри сулууспалыыр.
Сэрии кэнниттэн Саха тыйаатырыгар артыыһынан үлэлиир.
1956 сыллаахха Луначарскай аатынан Ленинградтааҕы ускуустуба институтун иһинэн баар салайааччылар үрдүкү куурустарын бүтэрэн кэлэн, 5 сыл устата Үөһээ Бүлүүтээҕи государственнай драма көс тыйаатырын дириэктэринэн үлэлиир. Онтон 1963 сылтан Саха тыйаатырыгар төннөн кэлэн 1971 сыллаахха бочуоттаах сынньалаҥҥа тахсыар диэри үлэлиир[1].
Дьиэ кэргэнэ
[уларыт | биики-тиэкиһи уларытыы]Кэргэнэ Татьяна Ивановна Слепцова (Сергучева). Кыргыттара: Альбина Андриановна (тылбаасчыт), Айталина Андиановна (культуролог). Сиэнэ: Андриан Борисов (устуорук учуонай).
Наҕараадалара
[уларыт | биики-тиэкиһи уларытыы]Сэрии кэминээҕи наҕараадалара: «За взятие Вены», «За взятие Будапешта», «За взятие Праги», «За победу над Германией», Орден Великой Отечественной войны II степени.
Сэрии кэннэ: Кыайыы юбилейнэй мэдээллэрэ, уордьана. ССРС культуратын министерствотын, Саха АССР культуратын министерствотын Бочуоттаах Грамоталара уо.д.а.
Быһаарыылар
[уларыт | биики-тиэкиһи уларытыы]- ↑ Барашков Д.Ф., Егоров Т.Т., Протодьяконова Е.Н. уо.д.а. Ытык Бахсы. — Дьокуускай: Сайдам, 2020. — С. 622. — 732 с. — 500 экз.