Саха сиригэр национальнай бэчээт күнэ

Саха сиригэр национальнай бэчээт күнэ – олунньу 13 күнүгэр 2020 с. Саха сирин баһылыгын Айсен Николаев 1007 ньүөмэрдээх ыйааҕынынан бэлиэтэммит бырааһынньык. Бу күҥҥэ 1907 с. бастакы сахалыы политическай, общественнай уонна литературнай “Саха дойдута” (“Якутский край”) хаһыат бэчээттэммитэ. Бу хаһыат оччотооҕу ссыльнай-народоволецтар уонна интеллигенция көҕүлээһиннэринэн тахсыбыт.

Бу бырааһынньык Саха республикатын государственнай уонна официальнай тылларын киэҥник тарҕатарга, национальнай бэчээт эйгэтин уонна маассабай информация средстволарын үлэһиттэрин престиһин үрдэтиигэ ыҥырылынна. Ыйаах олоххо киириитэ элбэх национальностаах Саха сиригэр бэчээт опытын уонна үгэстэрин сөргүтүүгэ, тыл политикатын көдьүүһүн үрдэтиигэ көмөлөһөр сыаллаах.

“Саха дойдута” тахсыан инниннэ Саха сиригэр нууччалыы “Якутские епархиальные ведомости”, “Якутские областные ведомости”  хаһыаттар бэчээттэнэр этилэр. “Саха дойдута” бастакы саха тылынан бэчээттэммит чааһынай хаһыат буолбута Саха Өрөспүүбүлүкэ уонна бүтүн Арассыйа судаарыстыбатын суруналыыстыкатыгар олус улахан оруолу оонньуур.

Хаһыакка аҥардас сонуннар эрэ буолбакка литература бэчээттэнэрэ. Оннук гынан бэчээккэ художественай публицистическай ыстатыйалар, очерктар, кириитикэ, сатира уонна литературнай жанрдар тахсар буолбуттара. “Саха дойдута” кини кэнниттэн тахсыбыт “Саха олоҕо” уонна “Саха саҥата” хаһыаттарга суолу арыйбыта. Бу манна Анемподист Софронов, Алексей Кулаковскай, Николай Неустроев уонна атыттар үлэлээбиттэрэ, бэчээттэммиттэрэ.