Рыкунов Николай Осипович

Рыкунов Николай Осипович (1785-1833) — Саха сирин тас өттүгэр үөрэммит бастакы саха, Саха Истиэпэннээх Дууматын (Степной Дууматын) баһылыга.

1785 эбэтэр 1782 сыллаахха төрөөбүт. Аҕата Бойдус диэн балыксыт киһи эбит, сүрэхтэниитигэр Осип диэн ааты ылбыт. Үһүйээн кэпсииринэн, аҕатын кытта Өлүөнэ өрүскэ балыктыы сырыттахтарына ханнык эрэ эспэдииссийэ таарыйан ааспыт (А.А. Борисов сабаҕаларыынан И. Биллингс эспэдииссийэтэ буолуон сөп), аҕата уолун кинилэргэ туттаран ыыппыт.

1811 сыллаахтан Хаҥалас улууһун кулубатыгар Чооччо Айанньыытапка суруксуттаабыт. Онтон нэһилиэк ыстаарыһата (чаччыыната?) буолбут. 1812-1818 сыллардаахха улус кулубата буолбут. Үһүйээн кэпсииринэн сиэрдээхтик салайбытын иһин баайдар сөбүлээбэккэлэр, хос талыллыбатах.

1823 сыллаахха Бороҕон улууһун кулубатын Иван Мигалкины уонна Хаҥалас улууһун кулубатын Савва Кириллини кытта сахалар дэлэгээссийэлэригэр киирэн Иркутскайга барбыт.