Родионов Николай Николаевич (1886-1937)
Родионов Николай Николаевич (1886-1937) — Колчак Сибииргэ былааһын кэмигэр Благовещенскай куорат кулубата буола сылдьыбыт Өлүөхүмэттэн төрүттээх киһи, 1903 сыллаахтан бырабыыталыстыбаны утары аахсыйаларга кыттарын иһин полиция аһаҕас кэтэбилигэр сылдьыбыт, Күлүмнүүрдүүн алтыспыт.
Дьокуускайга Реальнай училищеҕа үөрэммит. Кинини бэйэтин билэр Ираида Клиорина суруйарынан[1], ол үөрэнэ сылдьан Игорь Будилевич диэн көскө сылдьар өрөбөлүссүйүнүөрү кытта билсэн кини дьайыытыгар киирбит. Полиция кэтэбилигэр киирбититтэн сылтаан училищеттан үүрүллүбүт. Өлүөхүмэҕэ төннөн тиийэн дьаамсыктар забастовкаларын тэрийбит. 1906 сыллаахха Күлүмнүүрдүүн бырабыыталыстыбаны утары аахсыйаорга кыттыбыт. Өлүөхүмэҕэ олорор кэмигэр сыылынайдар Саха уобалаһыттан күүрүүллэригэр көмөлөһөр эбит.
Клиорина ахтарынан, кинилэр Благовещенскайга олороллорун саҕана (Харбинтан 1917 сыл ахсынньытыгар көспүттэр) куорат баһылыган олорбут:
"Ну, а в Благовещенске тогда был "Городским головой" дядя Коля, Николай Николаевич Родионов... Наши семьи сдружились потому, что Н.Н. Родионов был тоже якутянином, родом из Олекминска..."
1924 сыллаахха Читааҕа Күлүмнүүрдүүн Халыма туһунан мөккүспүтүн Клиорина ойуулуур: Күлүмнүүр (ол саҕана Саха сирин Москубатааҕы постпредствотын үлэһитэ) Саха Өрөспүүбүлүкэтин сирдэрин уонна экэниэмикэтин сайдыытын турууласпыт, Алдан көмүһүн хостууру, уонна Чуумпу далайга Айаан пуордун нөҥүө тахсары, оттон Родионов Дальревком аатыттан Халыманы Саха АССР-тан хайытан ылары туруорсубут, Дьокуускайтан сатаан салаллыа суоҕа диэн матыыптаан. Клиорина суруйарынан, ол да буоллар М.К. Аммосов кэлин Родионову Саха сиригэр үлэлии ыҥырбыт (оҕо эрдэҕиттэн 1905-06 сыллартан билэр буолан диир). Онно Н.Н. Захаренко (Клиорина таайа) салалтатынан САССР госпланын сэкиритээринэн үлэлээбит. Аммосовтыын чугаһыспыта бэрт буолан 1928 сыллаахха кинини батыһан Казахстааҥҥа барбыт.
Сураҕынан 1934 сыллаахха хаайыллыбыт (Клиорина сабаҕалыырынан, Карлагка сыппыт). Кэлин Караганда куоракка олоро сылдьыбыт. 1937 с. кулун тутар 19 күнүгэр иккистээн хаайыллыбыт, 1937 с. сэтинньи 1 күнүгэр ытыллыбыт. Донской манастыыр сиригэр көмүллүбүт.
Дьиэ кэргэнэ[уларыт | биики-тиэкиһи уларытыы]
- Кэргэнэ Александра, эрэ бастаан хаайыллыбыт кэмигэр бэйэтигэр тиийинэн өлбүт
- Кыыһа Муза
Быһаарыылар[уларыт | биики-тиэкиһи уларытыы]
- ↑ Клиорина И.С. Куррикулум витэ (Краткие сведения жизни): Опыт автобиографии / Корякин П.И.. — Новосибирск: Архимед, 2020. — С. 42. — 389 с. — ISBN 978-5-6044270-5-7