Пейви Шафак
Шафак Пейви (1976 с. от ыйын 10 күнүгэр төрөөбүт)[1] — туурак дипломата, публицист уонна бэлиитик. Кини Турция Улуу Национальнай мунньаҕар Стамбул провинцияларын интэриэстэрин көмүскүүр Норуодунай-Өрөспүүбүлүкэтээҕи баартыйаттан дьокутаат. Турция парламеныгар талыллыбыт бастакы инбэлиит дьахтар, Холбоһуктаах Нациялар Тэрилтэлэрин Инбэлииттэр бырааптарыгар кэмитиэтин чилиэнэ. 2012 сыллаахха Павей АХШ Судаарыстыбаннай департаменын дьахталларга бэриллэр Эрдээх буолуу бириэмийэтинэн наҕараадаламмыта.
Биографията
[уларыт | биики-тиэкиһи уларытыы]Пейви 1976 сыллаахха от ыйын 10 күнүгэр Анкараҕа төрөөбүт. Кини төрөппүттэрэ -- Сахин уонна Айше Өнел биллиилээх суруналыыстаах суруйааччылар. 1994 сыллаахха кини ускуустубаны уонна киинэ устуустубатын үөрэтээри эрин кытта Швейцарияҕа көһөн барар. 1996 сыллаахха Цюрихха буолбут буойас саахалын түмүгэр, хаҥас илиитин уонна атаҕын сүтэрэр. Эһиилигэр үөрэҕин салгыыр былааннаах Лондоҥҥа көһөр. Онно олорон Пейви Вестминстер университетыгар норуоттар икки ардыларынааҕы сыһыаннаһыылары үөрэтэр, Лондоннааҕы экэниэмикэ оскуолатыгар аспирантураны бүтэрэр.
Карьерата
[уларыт | биики-тиэкиһи уларытыы]Үөрэҕин бүтэрэн баран Пейви Холбоһуктаах Нациялар Тэрилтэлэрин Үрдүкү хамыһаарын кэнсэлээрийэтигэр үлэҕэ киирэр. Алжир, Египет, Иран, Ливан уонна Сирия курдук дойдуларга норуоттар икки ардыларынааҕы сыһыаҥҥа уонна гуманитарнай көмөҕө эппиэттээх буолар. Итини сэргэ Пейви киин Дьобуруопаҕа Венгрияҕа ХНТ UNHCR тэрилтэтигэр пресс-сэкирэтээринэн, кэлин ХНТ Үрдүкү хамыһаарын Киһи быраабыгар департаменын салайааччытынан үлэлээбитэ.
Итини сэргэ Пейви Стамбулга «Агос» диэн нэдиэлэ ахсын тахсар эрмээннии-туурактыы хаһыат обозревателинан үлэлээбитэ, үс кинигэни суруйбута. Гарвард университетын, Лондоннааҕы Уран королевскай академиятын уонна Норвегия дизайнердарын сэбиэтин кытары араас кыттыгас бырайыактары олоххо киллэрсибитэ. Кини "3 Numarali Peron" ("13 нүөмэрдээх платформа") диэн ийэтинээн Айше Өналлыын суруйбут тимир суол саахалын туһунан кинигэлэрэ Турцияҕа бестселлер буолбута. "Права беженцев в Иране" диэн кинигэтин Нобель бириэмийэтин лауреата Ширин Эбадины кытары суруйбута.
Пейви 15 сыл устата кыраныысса таһыгар олорон баран, 2011 сыллаахха Турцияҕа төннөн кэлэн, парламент дьокутаатыгар хандьыдаатынан турбута. Ол түмүгэр, 2012 сыллаахха ХНТтан уурайан, Стамбул провинциятыттан Турция парламенын бастакы инбэлиит дьахтар дьокутаата буолбута.
Наҕараадалара
[уларыт | биики-тиэкиһи уларытыы]- АХШ Госдепартаменын Эрдээх буолуу Норуоттар икки ардыларынааҕы бириэмийэтэ
- Ыччат Норуоттар икки ардыларынааҕы Эйэ бириэмийэтэ
- Британия национальнай светскэй уопсастыбатын бириэмийэтэ (2014)[2]