Партизан орто оскуолата

Нэһилиэккэ оскуола диэн суоҕа. Аан бастаан 1930 сыллаахха 1 кылаас аһаллыбыта. Оскуола “Хаҥас уола” диэн киһи саха балаҕаннаах нууччатын дьиэтэ этэ. Ыксатыгар эмиэ саҥа тэриллибит “Чомоорко” коммуна чилиэннэрэ, Сэкиирэп баай улахан саха балаҕаннаах нууччатын дьиэтигэр бэрт элбэх дьукаах буолан, ыга симсэн олороллоро.

Бастакы учуутал Василий Авксентьев этэ, кинини кулаак уола диэн ууратан кэбиспиттэр. “Хара былыт” диэн сиргэ олороллоро. 1931-32 үөрэх дьылыгар оҕолору Лазарь учуутал үөрэппитэ, кини кэнниттэн Сивцев И.Н. учууталлыы кэлбит. 1932-33 үөрэх дьылыгар 3 кылааска учууталынан Анна Яковлевна Туласынова кэлбит, бу кэмҥэ саҥа улахан оскуола тутуута саҕаламмыт.