Оскуола туһунан хоһоон

КЫРДЬАҔАС ОСКУОЛА

Хайдах да күннэр-дьыллар

Хотоҕостуу субуллан Аалыҥнаан, айаатаан

Ааһан да истэллэр Оҕо сааспыт биһигэ

Олохтоох кырдьаҕас оскуолабыт

Нэһилиэкпит ортотугар

Налыйан, иһиллээбит курдук

Эмиэ да тугу эрэ кэтэспиттии

Эрэнэ, долгуйа тураахтыыр

Бу элбэх оҕо-дьон үөрэнэн

Билиини-көрүүнү иҥэринэн

Үтүө дьоҕуру баһылаан

Үлэ араас хайысхатын

Үлүһүйэн туран ылынан

Үлэлии-хамсыы сылдьаллар.

Бу сылаас, истиҥ уйаҕа

Былыргы дьыллар мындааларыгар

Үгүс оҕону үөрэтэ-такайан

Үтүөҕэ-кэрэҕэ угуйан

Үлэлээн ааспыт үтүөлээх учууталлар

Үтүө кэрэ кэмнэрин

Истиҥ сылаас тылынан

Иһирэхтик ахталлар

Аныгы сайдыылаах кэмнэргэ

Алыс олорон хаалбакка

Эргэни саҥанан солбуйан

Элбэҕи, үйэлээҕи эрэннэрэр

Саҥа үйэ ирдэбилинэн

Саҥа оскуола сандаарда

Бу сылаас, сырдык кыһаҕа

Биһиги кэлэр кэскиллэрбит

Кэрэхсэнэр кэрэ ыччаттарбыт

Кыһаллан туран үөрэнэн

Үрдүккэ, сырдыкка талаһан

Үүнэн, үрдээн иһиэхтэрэ  

Үгүһү айа туруохтара

Үтүө дьон аатырыахтара

Төрөөбүт түөлбэлэригэр

Төрүт олоҕу төлкөлөөн

Ол ааспыт ыарахан сылларга

Олорон, үлэлээн күргүөмнээх олоҕу тутуспут

Үтүөкэн дьоммутун санатан

Үйэлэрин уһатан

Кырдьары билиммэт

Кырдьаҕас кыһабыт

Музей дьиэ аатын сүгэн

Махтал, таптал тылларын иҥэринэн

Уһун үйэлэргэ туруохтун!

Галина Михайловна Соловьева

Нам улууһун Партизан орто оскуолатын учуутала

Саха өрөспүүбүлүкэтин үөрэҕириитин туйгуна

Үөрэҕирии ситимин бочуоттаах ветерана