Мин теруттэрбинэн киэн туттабын

      Ийэбинэн Аһыкай аҕа ууһуттан тардыылаах эбиппин. Эбэм Степанида Павловна -Никифоров Павел Васильевич (1907-1942) кыыһа. Бу Павел Васильевич диэн Манньыаттаах Баһылай (Никифоров Василий Сергеевич) ииппит уола.
 Кини аҕата (мин хос-хос эһэм) Василий диэн 1881 с.т. киһи. Кини Агафья Михайловна (1880 с.т.) диэн кэргэннээх эбит. Кинилэр 4 оҕоломмуттар: Дмитрий, Герасим, Акулина, Павел.
  Василий аҕата, мин хос-хос-хос эһэм,  Николай (Уһун Ньукулаас, 1826с.т.) диэн эбит. 1911 сыл кэннэ өлбүтэ диэн буолар. Уһун Ньукулаас – Манньыаттаах Баһылай бииргэ төрөөбүт убайа. Кини 2-тэ кэргэннэммит: бастакы кэргэнэ Феодосия Саввична (1846-1901), иккиһэ – Анна Елизаровна (1856-1911). Бастакы кэргэниттэн 2 уоллаах: Николай -1(1862-1927), Василий (1881), иккиһиттэн  биир кыыстаах: Матрена (1903 с.т.). Василий диэн уолуттан мин хос эһэм Павел Васильевич төрүүр. Ол аата, Манньыаттаах Баһылай улахан убайын сиэнин ииппит эбит. Уһун Ньукулаас Аһыкайга Ахханга куулатыгар олорбут, кэргэнэ сэрии буолуор диэри оҕолорунаан олорбуттара дииллэр. Хос эһэм Павел Васильевич Аһыкайга Эмис алаас арҕаа баһын куулатыгар олорбут үһү.
  Хос эбэм Ирина Ивановна (1909 - 1942) диэн, эбэм ахтарынан, ыарыһах, уҥуоҕунан кыра, уһун суһуохтаах, иистэнньэҥ, түргэн туттуулаах дьиэ хаһаайката үһү. 1942 сыллаахха алтынньы ыйга ыалдьан өлбүт. Хос эһэм суоччутунан үлэлии сылдьан 1942 с бэс ыйын 23 күнүгэр сэриигэ барбыт.Кинилэр 5 оҕоломмуттар: Надежда, Елена, Артем, Степанида. Тулаайах хаалбыт оҕолору аймахтара ылбыттар.
   Мин эбэм Степанида Павловна диэн, 1937 сыллаахха атырдьах ыйын 10 күнүгэр 1-кы Тыыллыма нэһилиэгэр Аһыкай диэн алааска төрөөбүт. Кини элбэх оҕолоох убайыгар Никифоров Геннадий дьиэ кэргэнигэр олорон дьиэ ис-тас үлэтигэр, оҕо көрүүтүгэр көмөлөспүт. Өр кэмҥэ ыалдьан хаалан үөрэммэтэх. Билигин кини баара буоллар 83 саастаах буолуо этэ. Эбээ диэн аптаах тыллаах, минньигэс астаах, сылаас илиилээх көмүскүүр киһибит буолар этэ. Эбээлээхпиттэн мин үөрэбин, киэн туттабын. Миигин эбэм ааттаабыта, мин эбээ оҕотобун. Эбэм Романов Петр диэн киһиэхэ кэргэн тахсан 5 оҕолоох: Александр (1960 с.т.), Екатерина (1961 с.т.,), Алексей (1963 с.т.,), Людмила (1964-1993 сс., ),уонна мин ийэм Матрена (1966 с.т.)
  Эбэм убайа Артем Павлович Никифоров – Дьокуускайдааҕы художественнай училищены бүтэрэн, художник-портретист идэлээх. 1956 – 1964 сс. бокса республика хамаандатын чилиэнэ. Бокса республика 8 төгүллээх чемпиона,  1960 с. РСФСР норуоттарын спартакиадатын 3-с бириистээх миэстэтин финалиһа уонна сахалартан бастакы бокска ССРС спордун маастара. Билигин 87 саастаах.
  Эбэм эдьиийдэрэ - Надежда (1929-2004) кэргэнэ Юмшанов Николай Семенович (1919-1984)

Елена – эрдэ ыалдьан олохтон барбыт.

Сиэнэ Роман Кривогорницын суруйда 14.12.20