Маркова Татьяна Афанасьевна

Олоҕун олуктара

Маркова (Фомина) Татьяна Афанасьевна 1956 сыллаахха Чурапчы оройуонун Мындаҕаайы сэлиэнньэтигэр төрөөбүтэ. 1984 сылтан РФ уонна Саха сирин Суруналыыстарын сойууһун чилиэнэ, СР Суруналыыстарын сойууһун “Кыһыл көмүс бөрүө” (1990, 2000 сс.) бириэмийэтин лауреата, СР култууратын үтүөлээх үлэһитэ, Суруналыыстыкаҕа СР Государственнай бириэмийэтин лауреата (2009 с.)

СГУ ИФФ саха салаатыгар 1974 сыллаахха үөрэнэ киирбитэ, III кууруһу бүтэрэн баран, М.Горькай аатынан Ураллааҕы государственнай университет суруналыыстыкаҕа факультетыгар көспүтэ. Үөрэҕин 1980 сыллаахха бүтэрэн, дойдутугар кэлэн айар үлэтин өрөспүүбүлүкэ ыччатын “Эдэр коммунист” (“Сахаада”) хаһыатын корреспонденынан, отделын сэбиэдиссэйинэн саҕалаабыта. 1993 сылтан “Саха сирэ” хаһыат үөрэххэ, култуураҕа уонна духуобунаска салаатын редактора, редколлегия чилиэнэ.

Айар үлэтэ

Суруналыыс Татьяна Маркова улуустарынан ыытыллар Олоҥхо ыһыахтарын бэлэмнэнии үлэлэриттэн саҕалаан, нэһилиэктэргэ отделын айар экспедицияларын тэрийэн, сыллата “Саха сирэ” хаһыакка киэҥ хабааннаахтык сырдатар.

2015 сыллаахха Чурапчыга ыытыллыбыт IX Олоҥхо ыһыаҕар анал рубрикаҕа үлэлээбитэ. “Мин Олоҥхо дойдутун оҕотобун”, “Муҥха олоҥхото”, “Уруйдан, Улуу олоҥхо!” фестиваллар, куонкурустар тустарынан матырыйааллар киэҥ ааҕааччыга кэмигэр тириэрдиллибиттэрэ.

Олоҥхону сахалартан бастакынан грампластинкаҕа суруйтарбыт норуодунай артыыс Гаврил Колесов, Ийэ олоҥхоһуттар Бүөтүр Решетников, Афанасий Соловьев, Даарыйа Томская-Чаайка, олоҥхону пропагандалааччы Ким Колесов, олоҥхоһут Петр Тихонов, олоҥхону чинчийээччи учуонай Василий Илларионов, о.д.а. тустарынан суруйуулара ааҕааччы биһирэбилин ылбыттара. Олоҥхо эйгэтин үөскэтии проблемаларын, олоҥхо тиэмэлэригэр үлэлиир педагогтар, худуоһунньуктар, суруйааччылар, артыыстар, култуура үлэһиттэрин тустарынан суруналыыс Татьяна Марковна ааҕааччыга эмиэ бэрт итэҕэтиилээхтик, тиийимтэтик суруйар.

Сигэлэр

Чурапчы улууһун олоҥхоһуттара. Антология. Дьокуускай.Алаас, 2015.

Өссө маны көр

• Саха Өрөспүүбүлүкэтин суруналыыстыкаҕа Судаарыстыбаннай бириэмийэтэ