Колодезникова Елена Дмитриевна

Колодезникова Елена Дмитриевна — киһи организма намыһах температураларга үөрэниитин чинчийбит учуонай, ХИФУ Мэдиссиинэ институтун преподавателэ, Саха Өрөспүүбүлүкэтигэр чэгиэн олоҕу тарҕатыыны саҕалаабыт дьонтон биирдэстэрэ, мэдиссиинэ билимин хандьыдаата, СӨ уонна РФ доруобуйатын харыстабылын туйгуннара.

1939 с. ыам ыйын 20 күнүгэр Саха АССР Амма сэлиэнньэтигэр төрөөбүт. 1963 сыллаахха СГУ мэдиссиинэ факультетын бүтэрбит (бастакы выпуск). 1963-64сс. Алдан оруйуонун Золотинка балыыһатын главнай бырааһа. 1964 сыллаахтан СГУ МЛФ-тыгар (кэлин ХИФУ МИ) үлэлээбит. 1967-70 сс. - Москубатааҕы мэдиссиинэ 1 институтун аспирантуратыгар үөрэммит. 1972 сыллаахха "Реактивные изменения в коже и бурой жировой ткани при длительном охлаждении" диэн тиэмэҕэ хандьыдаат диссэртээссийэтин көмүскээбит. "Бурая жировая ткань" диэн монографияны уонна 60-ча билим үлэтин, гистологияны үөрэтиигэ уонча мэтиэдикэ босуобуйатын бэчээттэппитэ.

Елена Дмитриевна Саха Өрөспүүбүлүкэтигэр чэгиэн олох иһин хамсааһыны саҕалаабыт дьонтон биирдэстэрэ. Араадьыйаҕа, тэлэбиидэнньэҕэ уонна бэчээккэ чэгиэн олоҕу тарҕатан куруук тахсар. Чэгиэн олоҕу тарҕатыыга 4 брошюраны уонна 40-тан тахса ыстатыйаны бэчээттэппитэ.

"Билии" уопсастыба, доруобуйа харыстабылын министиэристибэтин, үөрдүк үөрэх судаарыстыбаннай кэмитиэтин, СӨ Бэрэсидьиэнин наҕараадаларынан бэлиэтэммитэ.