Капитонов Адриан Егорович

Капитонов Адриан Егорович (сорох докумуоннарга Андриан), юрист, Өлүөхүмэ улууһун биллэр-көстөр киһитэ, Сахалар 1912 сыллааҕы сийиэстэрин кыттыылааҕа.

Иккис Нөөрүктээйи нэһилиэгэ. Кыыллаах. Нэһилиэгин ыстаарастата, улууһун кулубата буола сылдьыбыт. Юрист үөрэхтээх, бочуоттаах мировой судьуйа. К. Завадскай диэн Мама куорат (Иркутскай уобалас) промышленнигын юрист быһыытынан көмүскээн итэҕэлин ылар, онтон Завадскай кыыһын Евлампияны кэргэн кэпсэтэр.

1912 с. сахалар сийиэстэригэр бэрэстээтэл Күлүмнүүр солбуйааччытынан талыллан үлэлээбит (П.И. Сокольниковтыын), Романовтар династияларын 300 сылын өрөгөйүгэр барар депутация чилиэнинэн талыллыбыт, ол эрээри тоҕо эрэ Петербурга барбатах.

Колчак былааһын кэмигэр А. Капитонов Өлүөхүмэ уокуругун земскэй управатын бэрэссэдээтэлинэн үлэлээбитэ. 1919 с. Өлүөхүмэҕэ Колчак былааһа сууллубута, куоракка былааһы бассабыыктар ылбыттара. А.Капитонов күтүөтэ поручик Захаренконы кытта бэйэтин дьиэтиттэн тутуллан хаайыллыбыттара. Захаренконы Иркутскайга илдьэн, 1918 с. Центросибирь 12 комиссарын Өлүөхүмэ Куду күөлүгэр кыыллыы кыдыйбытын иһин сууттаан ытарга уурбуттара. А.Капитонов туох буруйга тиксибитэ билиҥҥитэ биллэ илик. Бу бэйэтин кэмигэр биллэр-көстөр киһи олоҕун хайдах түмүктээбитин туһунан этэр туох даҕаны көстүбэтэ.

Үс оҕолоох эбит. Сиэннэрэ Ужгород куоракка олороллоро биллэр. Суруйааччы Харысхал этэринэн 1929 с. элбэх киһи, П.Ксенофонтов дьыалатыгар түбэһэн, сыылкаҕа (үксүлэрэ Соловкига) ыытыллыбыттара. Капитонов, быһыыта, ол дьону кытта утаарыллан баран, дойдутугар төннүбэтэх.