Иевлев Егор Григорьевич

Иевлев Егор Григорьевич, 1922 сыллаахха кулун тутар 20 күнүгэр Хочо улууһун Арыылаах нэһилиэгэр төрөөбүтэ. Педагогическэй үлэ бэтэрээнэ , Улуу Аҕа дойду сэриитин уордьанын I истиэпэнин кавалера, Сунтаар улууһун бочуоттаах олохтооҕо, Иевлевтэр педагогическэй династияларын төрүттээчитэ.

Олоҕун олуктара

1938 с. Тойбохойго сэттэ кылааһы үөрэнэн бүтэрбитэ. Биир сыл нэһилиэк сэбиэтигэр сэкэритээрдээн баран, Тойбохойго ахсыс кылааһы бүтэрбитэ, онтон Сунтаарга киирэн оскуоланы бүтэрэн баран, учууталлар куурустарыгар үөрэнэ киирбитэ. Сэрии суостаах сыллара саҕаланан, үөрэҕин бүтэрбэккэ, 1942 с. Ийэ дойдутун көмүскэлигэр ыҥырыллыбыта. Бастаан Иркутскай уобаласка Мальта станцияҕа 586-с саппаас стрелковай полкаҕа байыаннай бэлэмнэниини ааспыта. Онтон 1943 с. тохсунньутугар арҕаа сэриилэһэ аттаммыта. Бастаан Москва анныгар Волоколамский оройуонугар 153-с стрелковай биригээдэҕэ түбэспитэ. Олунньу ый 20 күнүттэн күннэри-түүннэри туох баар бойобуой тэриллэрин сүгэн, хайыһарынан балтараа суукка кэриҥэ айаннаан фроҥҥа тиийбиттэрэ.Миинэ бытархайа атаҕар түһэн ыараханнык бааһырбыта. Москва, Киров куораттар госпиталларыгар эмтэммитэ, салҕыы фроҥҥа сылдьыбыта. 1946 с. ыам ыйыгар дойдутугар эргиллэн кэлбитэ. Кэлээт, Дьаархан оскуолатыгар учууталлаабыта. Бүлүү педтехникумун бүтэрбитэ. 1949-1951 сс. Аллыҥа оскуолатыгар сэбиэдиссэйдээбитэ. Онтон салгыы үөрэнэн, педагогическай институту бүтэрбитэ. 1953 сылтан Арыылаах оскуолатыгар завуһунан, дириэктэринэн бочуоттаах сынньалаҥҥа тахсыар диэри үлэлээбитэ.

Наҕараадалара уонна ытык ааттара

Аҕа дойду сэриитин уордьанын I истиэпэнин кавалера.
“Германияны Кыайыы иһин» мэтээл.
“Хорсунун иһин” мэтээл.
“Саха Өрөспүүблүкэтин учууталларын учуутала” бэлиэ.
Үлэ бэтэрээнэ.
Сунтаар улууһун бочуоттаах олохтооҕо.

Сигэлэр:

Книга педагогической славы Сунтарского улуса /Упр. образования Сунтар.улуса, Информ.-метод.центр Сунтар.упр.образования ; редкол.: П.А.Потапов и др. – Якутск : ОАО «Медиа-холдинг «Якутия», 2010. – 240 с
Кыайыыны, олоҕу уһансыбыттара: Сунтаар улууһун бочуоттаах уонна үтүөлээх үлэһит дьоно / хомуйан оҥордулар Н.Н.Спиридонов, А.К.Васильев; эп.эрэд.: Т.Н.Иванова уо.д.а. – Дьокуускай : Чопчу, 2020. 464 с.