Егоров Владимир Николаевич

Бикипиэдьийэ диэн сиртэн ылыллыбыт
Перейти к навигации Перейти к поиску

Егоров Владимир Николаевич — педагогическай наука кандидата, доцент, Аан дой­дутааҕы педагогическай үөрэхтээһин наукатын академиятын член-кор­рес­пон­де­на, Ньурба оройуонун Кукаакы нэһилиэгэр 1950 сыл ыам ыйын 12 күнүгэр колхоз­таах кэргэнигэр төрөөбүтэ.

1968 сыллаахха Маалыкай орто оскуолатын бүтэрэн ба­ран, икки сыл совхозка механизаторынан улэлээбитэ. Кини 1970 сыллаахха конку­руһу ааһан Дьокуускайдааҕы государственнай университет физико-математическай факультетыгар үөрэнэ киирбитэ уонна университеты ситиһиилэхтик үөрэнэн 1975 сыллаахха бүтэрбитэ, «физика преподавателэ» идэни ылбыта.

Университеты бүтэрэн оскуолаҕа физика учууталынан, республика сорох ос­куо­лаларын учууталларын техническэй хайысхалаах методическай холбуһуктарын са­лайааччытынан үлэлээбитэ. Ол кэмҥэ Красноярскай кыраай эбэҥки уокуругун кыт­та сибээһи олохтуур, онно кадрдары бэлэмнииргэ көмөлөһүү наадата үөскээ­битэ. Онон сибээстээн кэргэннии учуутал Егоровтар хоту сиргэ ыытыллыбыттара. Он­но Н.​ В. Егоров орто оскуола директорынан улэлээбитэ. Кини 30 сыл устатыгар но­руот үөрэҕириитигэр үлэлээн кэллэ, онтон уон сылыгар Эбэҥки уокуругар үлэ­лээтэ. Киниэхэ үөрэммит элбэх киһи салалтаҕа, наукаҕа тахсыылаахтык үлэлии сылдьаллар. В. Н. Егоров 1997 сылтан науканан дьарыктанар. Кыра комплектаах ос­куо­ла­лар проблемаларын туһунан тиэмэҕэ 1999 сыллаахха диссертацияны көмүскээн пе­да­гогическай наука кандидата буолбута.

Кини научнай үлэлэрин сүрүн хайысхатынан Хоту дойду усулуобуйатыгар үлэ­лиир кыра комплектаах оскуолалар, көһө сылдьан үөрэтэр оскуолалар ураты­ла­ра, проблемалара. Хоту дойду олохтоох омуктарын оҕолорун үөрэнэр усулуо­буй­аларан тэрийии, үөрэххэ чэпчэкитик киирэллэрин хааччыйыы курдук практическай суолталаах боппуруостара буолаллар.

Владимир Николаевич 14 бэчээттэммит научнай үлэлэрдээх. Кэнники 4 сылга атын автордардары кытта холбоһон Москваҕа «Akаdemia» издательстваҕа 2 моно­гра­фияны таһаартарда (2001, 2003 сс.), бэйэтэ хас да научнай ыстатыйалары суруйан бэчээттэттэ.

Кини научнай үлэтин таһынан элбэх үлэни толорор. Саха Государственнай педагогическай академиятын кафедратын уонна отделениетын олохтооһуҥҥа элбэхтик үлэлэспитэ. Владимир Николаевич СГУ педагогическай институтун комиссиятын чилиэнэ, кандидатскай үлэни бэлэмниир дьону салайар, сүбэлиир. Кини элбэх научнай-практическай конференциялар үлэлэригэр кыттар. Ол курдук 2003 сыллаахха Хабаровскай куоракка буолбут Бүтүн Россиятааҕы научнай практическай конференцияҕа «Национальное образование: реалии и перспективы» диэн тиэмэҕэ дакылаат онорбута.

В. Н. Егоров үлэтэ үрдүктүк сыаналанан, Аан дойдутааҕы педагогическай үөрэхтээһин наукаларын академиятын член-корреспондена буолбута.