Данилов Иннокентий Федорович

Бикипиэдьийэ диэн сиртэн ылыллыбыт
Перейти к навигации Перейти к поиску

Данилов Иннокентий Федорович - 1943 сыл ыам ыйын маҥнайгы күнүгэр Бордоҥ нэһилиэгэр Тойон Уйалаахха колхозтаах кэргэнигэр терөөбүтэ.

1970 сыллаахха Дьокуускайдааҕы государственнай университеты бүтэрэн физик учуутал идэтин ылбыта. Кини бастаан Маалыкай орто оскуолатын 1961 сыллаахха бүтэрэн баран, Иркутскайдааҕы педагогическай институкка киирбитэ, онтон бастакы курсу бүтэрээтин кытта армияҕа ынырыллыбыта, сулууспатын кэнниттэн үөрэҕин Дьокуускайга салҕаабыта.

1970—1974 сылларга Хатыы аҕыс кылаастаах оскуолатыгар бастаан завуһунан, онтон директорынан үлэлээбитэ. 1974—1978 сылларга ЫБСЛКС Ньурба оройуоннааҕы комитетын бастакы секретарынан талыллан үлэлээбитэ. Ити сылларга комсомол тэрилтэтэ тэрээһин-политическай өттүнэн салгыы бөҕергөөбүтэ, авторитета үрдээбитэ, комсомол чилиэннэрин докумуоннарын саҥаҕа уларытыы тэрээһиннээхтик ыытыллыбыта. 168 бастын комсомолецтар уонна 207 эдэр пионердар ССКП XXV съеһигэр рапорка илии баттыыр чиэскэ тиксибиттэрэ, 1200 орто оскуоланы бүтэрбиттэр комсомол путевкатынан совхозтарга производствоҕа барбыттара, бу сылларга комсомол оройуоннааҕы тэрилтэтэ ЫБСЛКС Киин Комитетын көһө сылдьар Кыһыл Знамятынан наҕараадаламмыта.

1979—1991 сылларга Иннокентий Федорович партия Ньурба оройуонунааҕы комитетын пропагандаҕа, агитацияҕа отделын сэбиэдиссэйинэн, райком секретарынан, райком партийнай комиссиятын председателинэн үлэлээбитэ.

1991—1995 сылларга Сүлэ оскуолатын директорынан үлэлээбтэ уонна бу оскуола 1992 сыллаахха республикаҕа бастакынан сири оҥоруунан дьарыктанар, экономическай хайысхалаах статустаах буоларын ситиспитэ. Кэнники сылларга Иннокентий Федорович бу оскуолатыгар социальнай педагог уонна Сүлэ нэһилиэгин администрациятыгар специалист быһыытынан тахсыылаахтык үлэлээтэ.

И. Ф. Данилов «Үлэҕэ килбиэнин иһин» медалынан, Эйэ Советскай фондатын Бочуотунай медалынан наҕараадаламмыта, «Комсомолга активнай үлэтин иһин», «РСФСР норуотун үөрэҕириитин туйгуна» знакторынан, ССКП уобаластааҕы комитетын, Комсомол Киин уонна уобатастааҕы комитеттарын, республика үөрэҕин министерствотын, республика Киин быыбардыыр комиссиятын бочуотунай грамотатарынан бэлиэтэммитэ.

Данилов И. Ф. партия уонна комсомол райкомнарын бюротун чилиэнинэн, олохтоох Советыгар уонна Ньурба поссоветын, Ньурба улууһун райсоветын депутатынан, ЫБСЛКС обкомун чилиэнинэн талылла сылдьыбыта.

Кини Ньурба улууһун уонна Сүлэ нэһилиэгин Бочуоттаах олохтооҕо.