Владимир Кыппыгыров

Ньурба улууһун Чуукаарыгар 1953 с. төрөөбүт Кыппырыгов Владимир Николаевич музыкаҕа дьоҕура оскуолаҕа үөрэнэр кыра сааһыттан биллибит. Ханнык эмэ инструменнарга оонньоотоллор эрэ батыһа сылдьан көрөр-истэр, кэрэ иэйиигэ уйдаран дуоһуйар, астынар эбит. Ордук ыала Виктор Филиппов гармошкаҕа имигэс тарбахтарынан оонньоон илигирэтэрин сөҕө көрөр, кэрэхсээн истэр идэлэммит. Ол иһин киЬитэ Володяны үөрэтэр, инструменын уларсар буолбут. Аан бастаан Ольга Иванова "Манчаары" диэн ырыатын оонньуу үөрэммит, онтон тэптэн ырыалары, үнкүүлэри 7-с кылааска үөрэнэ сылдьан табаарыстарыгар оонньуур буолан барбыт.

1970 с. билигин республикаҕа киэҥник биллэр, самодеятельной композитор Е.М. Поликарпов Чуукаарга ырыа учууталынан үлэлии кэлэн, музыкальнай куруһуогу аһан, нотаҕа, баяҥҥа үөрэтэн барбыт. Тоҕо эрэ 20-чэ оҕоттон соҕотох Володяны хаалларан дьаныЬан үөрэтэр, сүбэлиир, музыкальнай училищеҕа хайаан да үөрэниэхтээҕин этэр буолбутун туһунан Володя истиҥик ахтан аһарар. Кини училищеҕа үөрэнэрэ наадалааҕын туһунан оччолорго оройуон культураҕа отделын сэбиэдиссэйэ К.Д. Уткин, саҥаһа, музыковед, искусствоҕа наука кандидата Г.Г. Алексеева элбэхтик эппиттэрэ, сүбэлээбиттэрэ. Ол иһин Дьокуускайга музыкальнай училищеҕа духовой отделениеҕа, кларнет кылааһыгар үөрэнэ киирбитэ. 1 сыл үөрэнэрин кытта армияҕа ыҥыраннар, Монголияҕа сулууспалыыр. Онно сылдьан эдэр саас эрчимигэр тэптэрэн байыаннай авиационнай училищеҕа үөрэнэр баҕа санаата күөдьүйбүтүн тохтотон, уоппускаҕа дойдутугар кэлэ сырыттаҕына, убайдара Петр, Прокопий музыкатыгар салгыы үөрэнэрин модьуйбуттар. Сулууспатын кэнниттэн училищетыгар салгыы үөрэнэригэр, ситиһэригэр учууталлартан ордук турунан, кыһанан композитор З.К. Степанов көмөлөспүтүн махталынан кэпсиир. 1977 с. училищетын бүтэрэн Ньурба Маалыкайыгар музыкальнай оскуолаҕа биир дойдулаахтарын, саха дьахталларыттан бастакы композитор Полина Иванованы, Любовь Ноговицынаны, Раиса Ушканованы кытары үлэлиир. Кэлин культура дьиэтигэр уус-уран салайааччынан, директорынан, уус-уран сырдатар биригээдэ ыстаарсай методиһынан 1989 сылга диэри улэлиир. Оттон кэргэнин дойдутугар Кэбээйи улууһун Сиэгэн күөлугэр табаарыстыбаҕа көһөн үлэлии сылдьар.

Володя өссө оскуолаҕа, училищеҕа Уөрэнэ сылдьан ырыа матыыбын айан холоно сылдьыбыта. Училищеҕа үөрэнэ сылдьан айбыт бэрт аҕыйах ырыаларын Е.Поликарповка көрдөрбүтүгэр сороҕун сирэн, сөбулээн, хайдах конноруохтээҕин,ситэрихтээҕин туһунан сүбэ-ама биэрбит. Маалыкайга үлэлии сырыттаҕына наставнига К. Уткин төрөөбут күнүгэр-үбүлүөйүгэр ыҥырыллан, кини тылларыгар "Баҕа санаа" диэн ырыаны айбытын ыллаан биһирэммит. Онтон тирэх ылан ырыаларын республикатааҕы норуот Дьиэтигэр ыытан сүбэлэтэр, биһирэбили ылар.

"Ырыа айар да араастаах буолар эбит" диэн кэпсиир. Биирдэ директордыы олордоҕуна хачыгаар ыалдьыбытыгар, Сана Дьыл иннигэр солбуйан улэлии сылдьан эмискэ төбөтүгэр матыып киирэн кэлбитин сурунан ылбыт. Ол курдук "От ыйа", "Балаҕан ыйа" диэн ырыалара окко үлэлии сырыттаҕына чопчу баҕайытык киирэн кэлбиттэр.